केरळमधील त्रिशूरचे निवासी जोश कल्लूवेटिल यांनी माहिती अधिकाराचा वापर करत राज्याच्या माहिती विभागाला अर्ज सादर केला आहे. अशी कोणती कागदपत्रे आहेत, ज्यावरून पंतप्रधान नरेंद्र मोदी हे देशाचे नागरिक आहेत, ही बाब सिद्ध होते? पंतप्रधान नरेंद्र मोदी यांनी नागरिकत्वाचा पुरावा द्यावा, अशी मागणी या अर्जात करण्यात आली आहे. माहिती अधिकारांतर्गत हा अर्ज १३ जानेवारी रोजी दाखल करण्यात आला आहे.
चित्रपट दिग्दर्शक यांनीदेखील पंतप्रधान मोदींनी शिक्षण आणि जन्मदाखल्याचा पुरावा सार्वजनिक करावा, अशी मागणी केली होती. पंतप्रधान नरेंद्र मोदी यांनी राज्यशास्त्र विषयात घेतलेली पदवी आणि त्यांचा जन्मदाखला सार्वजनिक करण्याची मागणी केली होती. त्यावरून मोठा वादंग झाला होता. आता केरळमधील व्यक्तीने पंतप्रधान मोदींकडे नागरिकत्व सिद्ध करण्याची मागणी केल्याने हा विषय पुन्हा चर्चेत आला आहे.
नागरिकत्व सुधारणा विधेयकावरून केरळमध्ये मोठ्या प्रमाणावर आंदोलन सुरू आहे. केरळ विधानसभेने संविधानविरोधी असल्याचे म्हणत त्याविरोधात ठराव मंजूर केला. असे पाऊल उचलणारे केरळ पहिले राज्य ठरले. त्याशिवाय या कायद्याविरोधात केरळ राज्याने सर्वोच्च न्यायालयात धाव घेत याचिका दाखल केली आहे. या कायद्याविरोधात सर्वोच्च न्यायालयात जाणारे केरळ पहिले राज्य आहे.
दरम्यान, केरळ विधानसभेनंतर आता पंजाब विधानसभेनेही नागरिकत्व संशोधन कायद्याविरुद्ध (सीएए) ठराव मंजूर केला आहे. नागरिकत्व कायदा लोकशाही विरोधी आणि भारताच्या धर्मनिरपेक्ष प्रतिमेवर आघात करणारा असल्याचे नमूद करत या कायद्याविरोधातील ठराव आवाजी मतदानाने मंजूर करण्यात आला.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
