मुंबई टाइम्स टीम

‘मटाचे आणि माझे जुने ऋणानुबंध आहेत आणि मी मटाची नियमित वाचक आहे’ असं सांगत मधुराणीनं गप्पांना सुरुवात केली. ‘मालिकेतल्या या भूमिकेसाठी जेव्हा विचारणा झाली, तेव्हा नवऱ्याकडून खूप पाठिंबा मिळाला. ‘मी मुलीकडे बघतो. चांगली भूमिका आहे, तू कर’ असा विश्वास त्यानं दिल्यामुळे आणि कथा आवडल्यानं ही भूमिका करण्यासाठी मी होकार दिला’, असं मधुराणी म्हणाली.

ती पुढे म्हणाली, की ‘एका सर्वसामान्य गृहिणीला स्वतःची ओळख होते ही अशी कथा मला भावली. मधुराणी आणि अरुंधती या काहीशा विरूद्ध स्वभावाच्या असल्यानं भूमिका साकारताना काही आव्हानं येतात. मी आत्मनिर्भर, स्वतंत्र, पटकन मनातलं बोलणारी आहे. अरुंधती अगदी त्याच्या विरुद्ध आहे. एक गमतीदार उदाहरण द्यायचं झालं, तर मधुराणी स्वयंपाकघरात फार कमी जाते आणि अरुंधतीसाठी स्वयंपाकघर सर्व काही आहे.

मला या सगळ्यावर वेगळा विचार करावा लागतो. २५ वर्ष गृहिणी म्हणून काम करणारी स्त्री काय विचार करू शकेल, हा विचार करून बदल केले. आताची बदललेली अरुंधती मला जवळची वाटते’, असं तिनं सांगितलं.

मधल्या काळात जाहिरात, नाटक, चित्रपट केली असली, तरी तिनं मालिका केली नव्हती. मुलगी स्वरालीसाठी मध्ये ब्रेक घेतला होता. त्यानंतर ही भूमिका तिच्यासाठी महत्त्वाची ठरली. प्रेक्षकांनाही ही भूमिका खूप आवडतेय. ‘मालिका बघून अनेकांना आई काय करते याची जाणीव झाली. मला नेहमी असं वाटतं, की टीव्हीच्या माध्यमामुळे खूप जुनाट किंवा नको ते विचार रूजवले जातायत का? पण या मालिकेतून एक चांगला संदेश प्रेक्षकांपर्यंत जातोय. आई-मुलांचं नातं अधिक घट्ट होतंय. ‘मुलगा माझी बाजू घेतो, घरच्यांना मी दिवसभर काय करते हे समजलं’, अशा प्रतिक्रिया येतात तेव्हा छान वाटतं. गृहिणीची नोंद घेतली जाते ही महत्त्वाची बाब वाटते’, असं ती म्हणाली.

संवेदनशील आहे पण…

मी कलाकार म्हणून संवेदनशील आहे. पण, एखाद्या घटनेवर भाष्य करण्याचा अधिकार कलाकाराला आहे की नाही, याचा विचार प्रत्येकानं करायला हवा. एखाद्या घटनेबद्दल पूर्ण माहिती नसेल, तर भाष्य करू नये. फक्त एक बाजू माहिती असेल तर शक्यतो बोलू नये, असं मला वाटतं.

गाणं आलं आईकडून

प्रेक्षकांच्या आग्रहास्तव ‘पुसते पाणी डोळ्यांमधले घास भरवते जी ती आई…’ हे शीर्षक गीत मधुराणी गोखलेनं गाऊन दाखवलं. ती म्हणाली, की ‘माझी आई गायिका आहे. मी गाणं लहानपणापासून शिकत आले. मी आईचा प्रवास बघितला आहे. माझ्याकडे गाणं आईकडून आल्यामुळे ते हृदयाच्या जवळचं आहे. मालिकेसाठी विचारणा झाली तेव्हा मला सांगितलं गेलं होतं की मला मालिकेत गायचंसुद्धा आहे.’

कवितेची आवड

मला कवितेची आवडसुद्धा लहानपणापासून आहे. मी कविता करायचे. माझी आई रसिक आहे. कलांची जाण असल्यानं आणि ती स्वत: अभिरुचीसंपन्न असल्यामुळे तिनं मला सगळ्याच कलांविषयी थोडं थोडं शिकवलं. मला ती गाणं शिकवायची, तेव्हा कविता समजावून सांगून मग गाणं शिकवायची. यामुळे शब्दांची मजा, त्यांचे भाव कळू लागले आणि कवितेची आवड निर्माण झाली.

मध्यंतरी अभिनय करताना वाटलं की कविता हातातून निसटली. एका कार्यक्रमाच्या निमित्तानं कविता पुन्हा आयुष्यात आली. ज्यांची वाचनाची सवय मोडली, त्यांच्या संग्रही कविता राहावी या दृष्टीनं ‘कवितेचे पान’ याचे जवळपास ४८ एपिसोड्स केले.

वृत्तपत्र आवडतं

माझी सोशल मीडियाशी फार ओळख नाही. इथे प्रत्येकाचा दृष्टीकोन वेगळा असतो. मग त्यावर अनेकांची मतं, ट्रोलिंग हे सगळं नकोच. मी सोशल मीडियाचा उपयोग प्रेक्षकांपर्यंत पोहोचण्यापर्यंत, त्यांच्याशी संपर्कात राहण्यासाठी करते. माझी मतं मांडण्यासाठी वृत्तपत्रासाठी एखादा सदर लिहिणं मला जास्त योग्य वाटतं.

गुण हवेहवेसे

प्रत्येकावर निरपेक्ष प्रेम करणं, लोकांना आपलंसं करणं, कसलीच अपेक्षा न ठेवता सगळ्यांना जीव लावणं हे अरुंधतीचे गुण शिकावेसे वाटतात. मालिकेत अरुंधती असत्याच्या विरोधात जे करते त्यापेक्षा उत्कृष्ट काही असूच शकत नाही. ती योग्य ते करते आहे. ती ठाम आहे, हार मानणारी नाही. कुठल्याही स्त्रीला हेच करावंसं वाटेल.

मेकओव्हर हवा अंतर्बाह्य

प्रेक्षकांना अरुंधतीचा मेकओव्हर बघायचंय. पण, आमच्या टीमचं आणि माझंही म्हणणं आहे, की मेकओव्हर हा बाह्य नको, अंतर्बाह्य असायला हवा. तो आता हळूहळू जशी मालिका पुढे जाईल, तसा प्रेक्षकांना बघायला मिळेल.

एकावेळेस एकच

मधला जाहिरातींचा काळ खूप छान होता. तो प्रचंड मेहनतीचादेखील होता. मी खूप जाहिराती केल्या. पण, आता परत करणार नाही. मालिकेवर संपूर्ण लक्षं केंद्रित केलं आहे. एकावेळेस एकच काम. सध्या तरी पुढच्या कामाचा वगैरे विचार मनात नाही. सध्या फक्त अरुंधतीसोबत प्रवास करायचाय. मिळणारा अनुभव गाठीशी बांधते आहे.

व्हिडीओ कॉलवरून भेट

चित्रीकरणामुळे मी मुंबईत आणि माझं कुटुंब पुण्यात असतं. मी कामासाठी बाहेर आहे याची मुलीला जाणीव आहे. माझा नवरा तिला खूप छान सांभाळतो, वेळ देतो. मी आठवड्यातून एकदा वगैरे पुण्याला भेटायला जाते. पुण्याला गेल्यावर पूर्ण वेळ फोन ऑफ करून तिच्यासह असते. बाकी वेळेस व्हिडीओ कॉलवर भेटी होतातच.

संकलन – संपदा जोशी

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here