म. टा. प्रतिनिधी, कोल्हापूर: कोल्हापूर जिल्ह्यातील सहा तालुक्यात पाच हत्तींनी धुमाकूळ घातला आहे. कर्नाटकातून येणाऱ्या या हत्तींनी परतीचे नाव न घेता मुक्कामच ठोकल्याने शेतकरी मात्र हवालदिल झाला आहे. यामुळे त्यांना कर्नाटकात हलविण्यासाठी राज्यपातळीवर हालचाली सुरू झाल्या आहेत. त्यासाठी कर्नाटक आणि तामिळनाडू पॅटर्न राबविण्यात येणार असून पुढील आठवड्यात याबाबत निर्णय घेण्यात येणार आहे.

गेल्या पंधरा वर्षापासून कर्नाटकातून येणाऱ्या हत्तींचा कोल्हापूर जिल्ह्यातील शेतकऱ्यांना मोठा फटका बसत आहे. हे हत्ती पूर्वी चार पाच महिन्यानंतर परत कर्नाटकात जात होते. मात्र आजरा, गडहिंग्लज, चंदगड, राधानगरी, पन्हाळा व शाहूवाडी या तालुक्यात त्यांना खाण्यासाठी मुबलक चारा मिळत असल्याने ते परत जाण्याऐवजी मुक्काम ठोकणेच पसंत करत आहेत. जंगलात चारा, पाणीसाठा कमी पडला तर थेट गावानजिक येऊन ऊस, भातपिकांची नासधूस करत आहेत. त्यांना परतवण्यासाठी फटाके वाजवणे, सौरउर्जा कुंपन, चर मारणे असे विविध उपाय केले जात असले तरी त्याचा फारसा उपयोग होत नसल्याचे दिसत आहे. अल्पभूधारक शेतकऱ्यांना याचा मोठा फटका बसत आहे.

सध्या जिल्ह्यात एका टस्करासह सहा हत्तींचा मुक्काम आहे. या हत्तींचा उपद्रव प्रचंड वाढला आहे. दरवर्षी काही कोटींचे नुकसान होत असताना मिळणारी भरपाई मात्र अतिशय तोकडी आहे. यामुळे हत्तींना परत पाठवा म्हणून शेतकऱ्यांमधून मागणी होत आहे. यामुळे त्यांना परत पाठविण्यासाठी राज्यपातळीवर हालचाली सुरू झाल्या आहेत. राज्याचे वनमंत्री संजय राठोड यांनी बुधवारी एक बैठक घेतली. खासदार संजय मंडलिक, आमदार प्रकाश आबिटकर, आमदार राजेश पाटील व वनखात्याचे मुख्य सचिव दीपक म्हैसकर यांच्या उपस्थितीत झालेल्या या बैठकीत हत्तींना परतवण्यासाठी कर्नाटक व तामिळनाडू पॅटर्न राबवण्याचा निर्णय घेण्यात आला. कर्नाटकातून एक पाळीव हत्ती आणून माहूताच्या मदतीने जिल्ह्यातील हत्ती परत पाठवण्याचा प्रस्ताव आहे.

कर्नाटकातून ज्या मार्गाने हत्ती येतात, त्या मार्गावर काही ठिकाणी वायर फ्लेमिंग उभे करण्यावरही बैठकीत चर्चा करण्यात आली. हत्तींना परतवण्यासाठी तामिळनाडूमध्ये ज्या ज्या उपाययोजना केल्या आहेत, त्याचा अभ्यास करून त्याप्रमाणे उपाययोजना राबवण्यावरही एकमत झाले. यासाठी मोठ्या प्रमाणात निधीची गरज आहे. हा निधी उपलब्ध करून देण्याचे आश्वासन वनमंत्री राठोड यांनी दिले.

जिल्ह्यात हत्तींचा उपद्रव फार वाढला आहे. त्यामुळे त्यांना तातडीने परत पाठविण्यासाठी अनेक उपाययोजना राबविण्यात येणार आहेत. नेमकं कोणत्या पद्धतीने त्यांना परत पाठवायचे याबाबत पुढील आठवड्यात यावर निर्णय घेण्यात येणार आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here