दिवंगत अभिनेते लक्ष्मीकांत बेर्डे यांचा मुलगा आणि अभिनेता अभिनय बेर्डे याच्या फेक फेसबुक अकाउंटवरून एका मुलीची फसवणूक करण्यात आली आहे. या अकाउंटवरून त्या मुलीला मेसेज आला की ‘एका सिनेमासाठी तुझा बोल्ड फोटो पाठवून दे.’ अभिनयची आई आणि अभिनेत्री यांनी त्यांच्या फेसबुक अकाउंटवरून ही माहिती दिली आहे.
या फेक फेसबुक अकाउंटविरोधात तक्रार दाखल करणार असल्याचंही त्यांनी या पोस्टमध्ये लिहिलं आहे. प्रिया बेर्डे यांनी लिहिलंय, ‘सावधान …..हा प्रोफाइल अभिनयचा नाही, या प्रोफाइल वरून एका मुलीला कॉन्टॅक्ट केलं गेलं आणि सांगितलं की नागराज मंजुळे बरोबर एक फिल्म करतोय आणि त्यात बोल्ड सिन आहेत आणि तुझा एक बोल्ड फोटो पाठवून दे तर त्या मुलीने आम्हाला कॉन्टॅक्ट करून वरील माहिती दिली तेव्हा प्लिज कुणीही याची फ्रेंड रिक्वेस्ट स्वीकारू नका, आम्ही ऍक्शन घेत आहोत..या आधीही मी याबाबत पोस्ट टाकली होती हे ही नमूद करतेय.’
अभिनयच्या संबंधित फेक अकाऊंटची फ्रेंड रिक्वेस्ट आल्यास ती स्वीकारू नका अशी विनंतीही प्रिया बेर्डे यांनी केली आहे. प्रिया बेर्डे यांच्या या फेसबुक पोस्टवर त्यांच्या आणि अभिनयच्या चाहत्यांनी प्रतिक्रियाही दिल्या आहेत. हीच पोस्ट अभिनयलाही त्याच्या अकाउंटवरून शेअर करायला सांगा, असे सल्लेही दिले आहेत. अनेकांनी आपल्याला ही माहिती ऐकून धक्का बसल्याचे सांगितले आहे. प्रिया बेर्डे यांनी ही पोस्ट अभिनय आणि मुलगी स्वानंदी यांच्यासोबत शेअर केली आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
