वॉशिंग्टन/पॅरिस/लंडन: करोनावर नियंत्रण मिळवत असल्याचा दावा अमेरिकेचे राष्ट्राध्यक्ष डोनाल्ड ट्रम्प करत असले तरी दुसरीकडे परिस्थिती बिघडत असल्याचे चित्र आहे. अमेरिकेत एकाच दिवसांत जवळपास ८० हजार नवीन करोनाबाधित रुग्ण आढळले आहेत. तर, दुसरीकडे करोनाच्या दुसऱ्या लाटेचा सामना करणाऱ्या फ्रान्समध्ये एकाच दिवसात ४२ हजार बाधित आढळले आहेत. ब्रिटनमध्येही काही भागांमध्ये कठोर लॉकडाउन लागू करण्यात आले आहे.

करोनाच्या संसर्गामुळे अमेरिकेत आतापर्यंत दोन लाख २९ हजार २८४ जणांचा मृत्यू झाला आहे. तर, ८७ लाख ४६ हजारजणांना बाधा झाली आहे. अमेरिकेतील संसर्गजन्य आजार तज्ज्ञ डॉ. अँथोनी फाऊसी यांनी संपूर्ण अमेरिकेत मास्क घालणे सक्तीचे करण्याची वेळ आली असल्याचे म्हटले आहे. करोनापासून बचाव करण्यासाठी मास्कचा वापर करण्याचे आवाहन त्यांनी केले.

वाचा:

तर, युरोपमध्ये करोनाची दुसरी लाट आली आहे. फ्रान्स आणि ब्रिटनमध्ये करोनाबाधितांची संख्या वाढत आहे. फ्रान्समध्ये आतापर्यंत ३४ हजार ५०८ जणांचा करोनामुळे मृत्यू झाला आहे. ब्रिटनमध्येही वाढत्या करोनाला रोखण्यासाठी सरकारने काही भागात लॉकडाउनचे कठोर नियम लागू केले आहेत. वेल्समध्ये पूर्णपणे लॉकडाउन लागू करण्यात आला आहे. ग्रेटर मॅनचेस्टर, लिव्हरपूल सिटी आणि लँकशायरमध्ये लॉकडाउन लागू करण्यात आला आहे.

वाचा:

तर, दुसरीकडे करोनाबाधितांची संख्या वाढत असताना युरोपीय देशांची काळजी आणखी एका कारणामुळे वाढली आहे. युरोपात करोनाची दुसरी लाट आली असताना करोनाबाधितांमध्ये वृद्धांची संख्या मोठी असल्याचे समोर आले असल्याचे ‘सीएनएन’ने म्हटले आहे. युरोपीयन सेंटर फॉर डिजीस प्रीव्हेंशन अॅण्ड कंट्रोलने याबाबतचा इशारा जारी केला आहे. जवळपास १३ युरोपीयन देशांमध्ये ६५ वर्ष व त्याहून अधिक वयाच्या नागरिकांमध्ये संसर्ग फैलावत असल्याचा इशारा देण्यात आला आहे. फ्रान्समध्ये मागील सहा आठवड्यात ६५ व त्यावरील अधिक वयांच्या बाधितांची संख्या तीनपटीने वाढली आहे.

वाचा:

दरम्यान, युरोपात आठवडाभरात ९ लाख २७ हजार करोनाबाधित रुग्ण आढळले असून, युरोपातील आठवड्याच्या रुग्णसंख्येने गेल्या आठवड्यात उच्चांक गाठला असल्याचे जागतिक आरोग्य संघटनेने (डब्ल्यूएचओ) म्हटले आहे. ‘डब्ल्यूएचओ’ने विषाणूबद्दलचा जागतिक अहवाल प्रसिद्ध केला आहे. त्यामध्ये गेल्या आठड्यात युरोपात पॉझिटिव्ह रुग्णांची संख्या २५ टक्क्यांनी वाढली असून, जगभरात एकूण नव्या रुग्णसंख्येत ३८ टक्के वाढ झाल्याचे यात म्हटले आहे. रशिया, चेक प्रजासत्ताक आणि इटली या देशांमध्ये युरोपातील नवीन रुग्णांपैकी निम्मे रुग्ण आढळले आहेत. युरोपातील मृतांची संख्याही वाढत असून, गेल्या आठवड्याच्या तुलनेत करोनामृत्यूंची संख्या एकतृतीयांश वाढली आहे. गेल्या आठवड्यात स्लोवानियामध्ये रुग्णसंख्येत ४,८९० इतकी वाढ झाली असून, ही वाढ १५० टक्के इतकी आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here