महावितरणचा दिलासा; यंदा भारनियमन नाही

वीज खरेदी आणि वीज विक्री यामधील फरक बघता मागील तीन वर्षांत महावितरणाकडे साधारण २० टक्के वीज अधिक राहिली आहे. पुढील पाच वर्षांच्या प्रस्तावानुसार वीज शिलकी १५ ते १८ टक्क्यांदरम्यान राहण्याची शक्यता आहे. यामुळेच महावितरणला भारनियमनाची गरज भासणार नाही, असे चित्र सध्या आहे.

नवीन दरनिश्चितीबाबत महावितरणने महाराष्ट्र राज्य वीज नियामक आयोगाकडे याचिका दाखल केली आहे. याच याचिकेत महावितरणने वीज खरेदी, वीज खरेदीचा खर्च, विक्री विक्री, वीज पुरवठ्याचा खर्च यांची मागील तीन वर्षांची तसेच पुढील पाच वर्षांची माहिती मांडली आहे. त्यानुसार, पुढील काळात महावितरणची वीज खरेदी किंवा वीज विक्री दोन्हीमध्ये मोठी वाढ होणे प्रस्तावित आहे. पण त्यातून अतिरिक्त विजेची टक्केवारी मात्र घटणार आहे. महावितरणने सन २०१७-१८ व २०१८-१९मध्ये सरासरी १.३० लाख मेगा (दशलक्ष) युनिट विजेची खरेदी केली. त्या तुलनेत वीजविक्रीचा आकडा मात्र १.०१ ते १.०९ लाख मेगा युनिट इतकाच होता. सन २०१९-२०मध्ये कंपनी साधारण १.२८ लाख मेगा युनिट वीज खरेदी करीत असताना त्या तुलनेत १.०८ लाख मेगा युनिटचीच विक्री होण्याची शक्यता आहे. सन २०२१-२२ ते सन २०२४-२५ दरम्यान कंपनी साधारण १.३६ लाख ते १.५७ लाख मेगा युनिट विजेची खरेदी करणार आहे. त्या तुलनेत फक्त १.१४ ते १.३३ लाख मेगा युनिट विजेची कंपनीकडून विक्री होणार आहे.

कृषीपेक्षा औद्योगिक मागणी अधिक

महावितरणकडून चालू आर्थिक वर्षात औद्योगिक क्षेत्राला अधिक वीज पुरवठा होत आहे. सन २०१७-१८ व सन २०१८-१९मध्ये कृषी क्षेत्राचा पुरवठा अधिक होता. तर पुढील पाच वर्षांसाठी औद्योगिक क्षेत्रालाच अधिक पुरवठा प्रस्तावित आहे. प्रथम क्रमांकावर औद्योगिक, दुसऱ्या स्थानी कृषी व त्यानंतर घरगुती वापरासाठी वीज देणार आहे.

मेगा युनिटमधील विजेची स्थिती

वर्ष वीज खरेदी वीज विक्री

सन २०१७-१८ १ लाख २५ हजार ५११ १ लाख ०१ हजार ६७३

सन २०१८-१९ १ लाख ३६ हजार ४५२ १ लाख ०९ हजार ५३१

सन २०१९-२० १ लाख २८ हजार ७६६ १ लाख ०८ हजार ००३

प्रस्तावित

सन २०२०-२१ १ लाख ३६ हजार ८८८ १ लाख १४ हजार ५१०

सन २०२१-२२ १ लाख ४१ हजार ६५० १ लाख १८ हजार ८८३

सन २०२२-२३ १ लाख ४६ हजार ६४५ १ लाख २३ हजार ५०६

सन २०२३-२४ १ लाख ५१ हजार ९५० १ लाख २८ हजार ३९७

सन २०२४-२५ १ लाख ५७ हजार ५७२ १ लाख ३३ हजार ५८०