हेल्मेट न घातल्याने या महिलेसोबत असलेल्या व्यक्तीवर पोलिसांनी कारवाई केली. त्या, दरम्यान पोलिसांनी शिव्या घातल्याचा आरोप करीत महिलेने पोलिसाची कॉलर पकडली आणि मारहाण केल्याची घटना घडली आहे. या घटनेचा व्हिडिओ सोशल मीडियावर व्हायरल झाला आहे. शिवसेना नेते संजय राऊत यांनीही हा व्हिडिओ ट्विटरवर शेअर केला असून त्या महिलेवर कारवाईची मागणी केली आहे.
‘या बाईवर तात्काळ कारवाई करायलाच हवी, मुंबई पोलिसांच्या सन्मानाचा विषय. Take Action,’ असं ट्विट त्यांनी केलं आहे. त्याचबरोबर, गृहमंत्री अनिल देशमुख आणि मुंबई पोलिसांनाही टॅग केलं आहे.
नेमकं काय घडलं?
काळबादेवीच्या कॉटन एक्सचेंज नाका येथे शुक्रवारी वाहतूक पोलिस कॉन्स्टेबल एकनाथ पार्टे हे कर्तव्य बजावत होते. यावेळी मोहसीन खान आणि सादविका तिवारी हे दोघे दुचाकीवरून आले. मोहसीन याने हेल्मेट न घातल्याने पार्टे यांनी त्याला रोखले. दंडात्मक कारवाई करीत असताना या दोघांनी पार्टे यांच्याशी वाद घालण्यास सुरूवात केली. हा वाद इतका विकोपाला गेला की सादविका हिने पार्टे याच्या खाकीची काॅलर पकडली आणि त्यांना मारहाण करण्यास सुरूवात केली.
गर्दी जमा होताच तसेच याबाबतची माहिती मिळताच इतर पोलिस घटनास्थळी पोहचले आणि मोहसीन, सादविका यांना लोकमान्य टिळक मार्ग पोलिस ठाण्यात आणले. सरकारी कामात अडथळा आणि पोलिसांना मारहाण केल्याप्रकरणी गुन्हा दाखल करून पोलिसांनी दोघांना अटक केली. दरम्यान पार्टे यांनी शिव्या घातल्याने संयम सुटल्याचे सादविका हिने म्हटले आहे तर महिला असल्याचा गैरफायदा घेत तिने हात उगारण्याचे पोलिसांनी म्हटले आहे. या मारहाणीचा व्हिडिओ सोशल मिडीयावर व्हायरल झाला आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
