मल्टी कमॉडिटी एक्सचेंजवर शुक्रवारी बाजार बंद होताना सोने १०० रुपयांनी वधारले. सोन्याचा भाव प्रती १० ग्रॅम ५०७६६ रुपयांवर बंद झाला. चांदीचा भाव मात्र घसरला.शुक्रवारी चांदी १९० रुपयांनी स्वस्त झाली आणि ६२६१५ रुपयांवर बंद झाली.
इंडियन बुलियन अँड ज्वेलर्सनुसार सराफा बाजारात शुक्रवारी सोन्याचा भाव प्रती १० ग्रॅमला ५१२२३ रुपये होता. चांदीचा एक किलोचा भाव ६२५४५ रुपये झाला. युरोपात पुन्हा एकदा करोनची लाट येण्याची शक्यता आहे. त्यामुळे तेथील काही देशांनी लॉकडाउनचा निर्णय घेतला आहे. ज्यामुळे जागतिक बाजारपेठेत सोन्याचे भाव वधारले आहेत.
goodreturns या वेबसाईटनुसार शनिवारी मुंबईत २२ कॅरेट सोन्याचा भाव ५०२०० रुपये आहे. २४ कॅरेटसाठी तो ५१२०० रुपये आहे. दिल्लीत २२ कॅरेट सोन्याचा भाव ४९४०० रुपये आहे. तर २४ कॅरेटसाठी तो ५२८९० रुपये आहे. कोलकात्यात २२ कॅरेट सोन्याचा भाव ५०१०० रुपये आहे. तर २४ कॅरेटसाठी तो ५१७०० रुपये आहे. चेन्नईत २२ कॅरेट सोन्याचा भाव ४७११० रुपये आहे. तर २४ कॅरेटसाठी तो ५१२७० रुपये आहे.
मागील दोन महिन्यात सोने सहा हजार रुपयांनी स्वस्त झाले आहे. त्यामुळे दसऱ्याला सोने खरेदी करण्याचा सल्ला तज्ज्ञांनी दिला आहे. दसऱ्याला सोने खरेदी करणे शुभ मानले जाते. जर तुम्हाला सोन्यात गुंतवणूक करायची असेल तर गोल्ड ईटीएफ सुद्धा चांगला पर्याय असल्याचे जाणकार सांगतात. भविष्यात आर्थिक संकट आले तर सोन्यातील गुंतवणूक फायदेशीर ठरू शकते.
गुंतवणूक सल्लागारांच्या मते गुंतवणूकदारांनी आपल्या एकूण गुंतवणुकीपैकी १० टक्के १५ टक्के निधी हा सोने आणि त्याच्याशी संबंधित गुंतवणूक पर्यायांमध्ये गुंतवणूक करणे आवश्यक आहे. दीर्घकाळात सोन्यातील गुंतवणुकीने चांगला परतावा दिला आहे. मात्र याचवेळी करोना संकट आणि अमेरिकेतील निवडणूक यांचा परिणाम अल्प काळात सोने चांदीच्या किमतींवर होईल, असेही तज्ज्ञांनी म्हटले आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
