म. टा. प्रतिनिधी, नगर: ‘अतिवृष्टीमुळे पिकांचे व फळबागांचे मोठ्या प्रमाणात नुकसान झाले आहे. त्यातच राज्य सरकारने दहा हजार कोटींची जी मदत जाहीर केली, ती अतिशय तुटपुंजी आहे. परिपूर्ण पंचनामे न करता घाईघाईने राज्य सरकारने हे पॅकेज जाहीर केले आहे,’ आता घणाघात माजी मंत्री प्रा. राम शिंदे यांनी केला. ‘पावसामुळे नुस्कान झालेल्या शेतकऱ्यांना सरसकट मदत मिळण्याची गरज आहे. त्यानुसारच शेतकऱ्यांना राज्य सरकारकडून नुकसान भरपाई मिळवून देण्यासाठी भाजप कटिबद्ध आहे,’ असेही ते म्हणाले.

राज्यात विधानसभा निवडणूक होऊन एक वर्ष पूर्ण झाले आहे. या पार्श्वभूमीवर नगरमध्ये जिल्ह्याच्या कोअर कमिटीची बैठक भाजपने घेतली. या बैठकीला माजी मंत्री तथा भाजपचे प्रदेश उपाध्यक्ष प्रा. राम शिंदे, खासदार डॉ. सुजय विखे, आमदार बबनराव पाचपुते, मोनिका राजळे, माजी मंत्री शिवाजी कर्डिले, भाजप जिल्हाध्यक्ष अरुण मुंडे, शहर जिल्हाध्यक्ष भैय्या गंधे, प्रा.भानुदास बेरड, प्रसाद ढोकरीकर, सचिन पोटरे आदी उपस्थित होते. या बैठकीनंतर आयोजित करण्यात आलेल्या पत्रकार परिषदेत प्रा.शिंदे बोलत होते.

‘जिल्ह्यामध्ये अतिवृष्टी झाली असून पिकांचे व फळबागांचे मोठे नुकसान झाले आहे. अद्यापही पंचनामे होतील का नाही ? अशी चिंता आहे,’ असे सांगून शिंदे पुढे म्हणाले, ‘राज्य सरकारने जाहीर केलेली मदत तुटपुंजी आहे. त्यामुळे शेतकऱ्यांना नुकसान भरपाई मिळवून देण्यासाठी आम्ही कटिबद्ध असणार असून त्यादृष्टीने नियोजन बैठकीत करण्यात आले आहे. याशिवाय वर्षभरात विजेचे लपंडाव सुरू असून शेतकऱ्यांची अडचण होत आहे. त्यामध्येही सुसूत्रता यावी, पंधरा दिवसात परिस्थिती सुधारावी, अशी आमची मागणी आहे. कापूस खरेदी केंद्र तातडीने सुरू करण्यात यावेत. जिल्ह्यातील प्रमुख रस्त्यांची दुरुस्ती करण्यात यावी, अशा विविध मागण्यांचे निवेदन भाजप लवकरच जिल्हा प्रशासनाला देणार आहे. याशिवाय नगर जिल्ह्यात सरसकट कर्जमाफी देण्याचा फज्जा उडाला असून यामध्ये सुधारणा करावी, व घोषित केल्यानुसार कर्जमाफी मिळावी, अशी आमची मागणी आहे.’

दरम्यान, मागील विधानसभा निवडणुकीत पराभव झाल्यानंतर भाजपच्या वरिष्ठ नेत्यांकडे विखे यांच्या विरोधात प्रा. शिंदे यांच्यासह जिल्ह्यातील काही पराभूत उमेदवारांनी तक्रार केली होती. याबाबत शिंदे यांना विचारले असता ते म्हणाले, ‘आम्ही जी तक्रार केली होती, ती पक्षाच्या वरिष्ठ नेत्यांनी ऐकून घेतली आहे. याबाबत दोन्ही बाजूचे म्हणणे ऐकण्यात आले आहे. वरिष्ठ पातळीवर याबाबतचा निर्णय प्रलंबित असून त्यावर आता काही बोलता येणार नाही. भाजपमध्ये जी शिस्त आहे, ती आम्ही पाळतो,’ असे सांगत त्यांनी अधिक बोलणे टाळले.

खडसे गेल्याचा परिणाम शून्य

‘ यांचा राष्ट्रवादीमध्ये प्रवेश झाला. त्यामुळे ‘खडसे’ हा आता भाजपसाठी भूतकाळ झाला आहे. खडसे यांच्या राष्ट्रवादी प्रवेशामुळे नगर जिल्ह्याच्या भाजपला कोणताही फटका बसणार नसून येथे खडसे यांच्या प्रवेशाचा परिणाम शून्य आहे. खडसे यांच्या संपर्कात नगर जिल्ह्यातील कोणीही नाही,’ असा दावाही यावेळी प्रा. शिंदे यांनी केला.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here