बाधितांच्या संख्येत उतार, रुग्ण दुप्पटीच्या कालावधीत वाढ

म. टा. खास प्रतिनिधी, मुंबई

मुंबईतील करोना रुग्णांच्या संख्येला उतार पडल्याचे दिसत असून त्यात मध्य मुंबईतील ‘हॉटस्पॉट’ ठरलेल्या विविध भागांचा समावेश आहे. करोनाने मुंबईत हातपाय पसरले, तेव्हा सर्वाधिक प्रादुर्भाव जाणवलेल्या अनेक भागांमध्ये आता परिस्थिती नियंत्रणाखाली आली आहे. रुग्णांच्या दुप्पटीचा कालावधीही वाढत चालला आहे. वरळी, परळ, लालबाग, शिवडी, प्रभादेवी, नायगावमध्ये रुग्णांची संख्या कमी कमी होत चालल्याचे सकारात्मक चित्र दिसत आहेत. मुंबई पालिकेच्या ताज्या आकडेवारीनुसार परळमधील रुग्ण दुप्पट कालावधी १९८ तर वरळीत १८० दिवस इतका नोंदविण्यात आला आहे.

मुंबईत मार्चमध्ये करोनाचा पहिला रुग्ण आढळला. त्यानंतर वरळीसह अनेक भागांमध्ये कंटेन्टमेंट झोनची संख्या मोठी होती. येथील करोना रुग्णांची संख्या सातत्याने वाढत असल्याने चिंतेची परिस्थिती होती. कालांतराने पालिकेसह वैद्यकीय क्षेत्रातील डॉक्टरांच्या चमूने केलेल्या सातत्यपूर्ण प्रयत्नांतून येथील चित्र बदलत गेले. त्यानंतर दक्षिण, मध्य मुंबईत सर्वाधिक रुग्णांची असलेली नोंद कमी होत गेली. त्याउलट रुग्णवाढीचे केंद्र पश्चिम उपनगरात सरकत गेले. सध्या पालिकेच्या आर-उत्तर (दहिसर), आर-मध्य (बोरीवली), आर-दक्षिण (कांदिवली), पी-दक्षिण (गोरेगाव) या चार विभागांचा अपवाद वगळल्यास इतर सर्व विभागांत रुग्ण दुप्पट दरवाढीचा कालावधी १०० दिवसांपेक्षा जास्त आहे. त्याचा प्रत्यय पालिकेच्या दैनंदिन करोना रुग्णांच्या नोंदीतून येत आहे.

ऑगस्टनंतर करोना रुग्णांची संख्या अचानक वाढत गेली. ती आता पुन्हा कमी होत गेली असली, तरी सणासुदीमुळे संसर्ग अजून वाढण्याची भीती आहे. मुंबईत रोज १२०० ते १५०० रुग्णांची नोंद होत आहे. गेल्या आठवड्यापूर्वी ही संख्या दोन हजारांपर्यंत होती. ती आता घटत चालली असल्याने काहीसा दिलासा आहे. परळमध्ये दररोज नव्या रुग्णांची संख्या २० ते २५, तर वरळी व प्रभादेवीमध्ये हे प्रमाण अनुक्रमे सरासरी १७ ते ३४ पर्यंत आहे. १६ ते २२ ऑक्टोबरपर्यंतच्या आकडेवारीची तुलना केल्यास परळमध्ये १६ ऑक्टोबरपर्यंत नऊ हजार ३३२ रुग्ण नोंद हेाती. ही संख्या २२ ऑक्टोबरनुसार नऊ हजार ५६३ एवढी आहे. तर, वरळी-प्रभादेवीचा विचार केल्यास ही संख्या आठ हजार ८१९ वरून नऊ हजार ६० इतकी झाली आहे.

दहिसरमध्ये चिंता
गेल्या काही दिवसांपासून दहिसर विभागातील रुग्णसंख्या सातत्याने वाढत आहे. त्यात रुग्ण दुप्पटीचा कालावधीत सर्वात कमी नोंदविला गेला आहे. या विभागात रुग्ण दुप्पट होण्याचा कालावधी ७२ दिवस आहे. तर, कांदिवलीतील कालावधी ८१ दिवसांचा आहे. या भागात आठवड्याभरात अंदाजे ५०० ते ८०० रुग्णांची भर पडत आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here