अनुष्का दिवटे (रा. पद्मावती सोसायटी, बिटको महाविद्यालयामागे, नाशिकरोड) ही बारावी उत्तीर्ण झालेली तरुणी दुपारीचारच्या सुमारास नाशिकहून दुचाकीवर (एमएच १५, डीझेड ७९५६) नाशिकरोड येथे घरी चालली होती. सेंट झेविअर्स शाळेजवळ मागून आलेल्या भरधाव ट्रकने (एमएच २४, एफ ९७८६) तिच्या दुचाकीला जोरदार धडक दिली. त्यात ट्रकखाली चिरडून अनुष्काचा मृत्यू झाला. अपघातामुळे काही काळ वाहतूक विस्कळीत झाली होती. घटनास्थळापासून जवळच असलेल्या उपनगर पोलिस ठाण्यातील पोलिसांना याबाबत माहिती मिळताच ते घटनास्थळी दाखल झाले. त्यांनी ट्रक ताब्यात घेतला. या प्रकरणी उपनगर पोलिस ठाण्यात गुन्हा दाखल करण्याचे काम उशिरापर्यंत सुरू होते.
वरिष्ठ निरीक्षक सुनील रोहोकले यांच्या मार्गदर्शनाखाली तपास सुरू आहे. येथे शाळा असूनही तशी सूचना देणारा फलक नाही. जय भवानीरोडकडे वळताना रस्त्याच्या दोन्ही बाजूंला गतिरोधक आहेत. मात्र, गतिरोधक असल्याचाही फलक नाही. गतिरोधकांवर पांढरे पट्टेदेखील नाहीत. या रस्त्यावर रात्रंदिवस वाहतूक सुरू असते. त्यामुळे येथे पूर्णवेळ पोलिस नेमणे गरजेचे आहे, असे मत वाहनचालकांकडून व्यक्त होते आहे. काही दिवसांपूर्वीच जेलरोडच्या कन्या शाळेसमोर ट्रकच्या धडकेने पती-पत्नीचा मृत्यू झाला होता.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
