नवी दिल्ली : भारतीय संघाचा ऑस्ट्रेलियाचा दौरा नोव्हेंबर महिन्याच्या अखेरीपासून सुरु होणार आहे. पण भारतीय संघाची जेव्हा आज निवड करण्यात आली तेव्हा दुखापतीमुळे रोहित शर्माला संघात स्थान देण्यात आले नाही. पण रोहित जर नोव्हेंबरच्या अखेरीपर्यंत फिट होणार नसेल तर तो आयपीएलमधील उर्वरीत सामने खेळू शकतो का, हा चाहत्यांपुढे मोठा प्रश्न उभा राहीला आहे. त्यामुळे रोहित शर्मा आता आयपीएलमधून माघार घेणार का? अशी समालोचक हर्षा भोगले यांच्या ट्विटनंतर सुरु झाली आहे.

हर्षा भोगले यांनी याबाबत एक ट्विट केले आहे. या ट्विटमध्ये हर्षा यांनी म्हटले आहे की, ” भारतीय संघ ऑस्ट्रेलियामध्ये डिसेंबर महिन्यात कसोटी सामन्यांची मालिका खेळणार आहे. तोपर्यंत जर रोहित शर्मा फिट होऊ शकत नसेल, तर तो या आयपीएलमध्येही खेळू शकणार नाही, असे मला वाटते. रोहित शर्माच्या फिटनेसवर लक्ष ठेवण्यात येणार आहे. पण त्यामध्ये क्वारंटाइन आणि प्रवासांतील अडचणीदेखील असतील.”

रोहितला किंग्स इलेव्हन पंजाबविरुद्धच्या सामन्यानंतर दुखापत झाली होती. त्यानंतर रोहित दोन सामने खेळू शकेलला नाही. मुंबई इंडियन्सने रोहितला दुखापतीमधून सावरण्यासाठी किती वेळ लागेल, याबाबतची अधिकृत माहिती दिल्याचे पाहायला मिळालेले नाही. पण रोहितला जर गंभीर दुखापत झाली असेल. त्याला आयपीएलनंतर होणाऱ्या ऑस्ट्रेलियाच्या दौऱ्यासाठी संघात स्थान देण्यात येणार नसेल, तर चाहत्यांपुढे रोहित शर्मा या आयपीएलमधील पुढील सामने खेळणार का, हा सर्वात मोठा प्रश्न असेल.

भारताचा संघ ऑस्ट्रेलियामध्ये कसोटी, एकदिवसीय आणि ट्वेन्टी-२० क्रिकेट सामन्यांच्या मालिका खेळणार आहे. पण या तिन्ही संघांत रोहितबरोबर वेगवान गोलंदाज इशांत शर्मा या दोघांना यावेळी स्थान देण्यात आलेली नाही. बीसीसीआयचा वैद्यकीय चमू या दोघांच्या दुखापतींवर लक्ष ठेवून आहे. सध्याच्या घडीला रोहित आणि इशांत यांना आयपीएलमध्ये दुखापत झाल्याचे आपण पाहिले आहे. त्यामुळे या दोघांचा विचार आज भारतीय संघ निवडताना विचार केलेला नाही. रोहित आणि इशांत दुखापतीमधून कसे सावरतात आणि कधी पूर्णपणे फिट होतात, याकडे बीसीसीआय लक्ष ठेवून असेल.

या भारताच्या संघात काही युवा खेळाडूंनाही स्थान देण्यात आल्याचे पाहायला मिळत आहे. भारताच्या ट्वेन्टी-२० संघात कोलकाता नाइट रायडर्सच्या वरुण चक्रवर्तीला स्थान देण्यात आले आहे. त्याचबरोबर आरसीबीचा वेगवान गोलंदाज नवदीप सैनीलाही भारतीय संघात स्थान देण्यात आले आहे. त्याचबरोबर भारतीय संघाबरोबर टी. नटराजन, कार्तिक त्यागी, इशान पोरेल आणि कमलेश नागरकोटी या युवा खेळाडूंनाही ठेवण्यात आले आहे. सध्याच्या घडीला करोना जगभरात आहे, त्याचबरोबर कोणत्या खेळाडूंना दुखापत झाली तर या युवा खेळाडूंना भारताकडून खेळण्याची संधी मिळू शकते.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here