दिनेशकडे केकेआरच्या संघाचे कर्णधारपद होते. पण दिनेशने स्पर्धा सुरु असतानाच आपले कर्णधारपद सोडले आणि केकेआरचे नेतृत्व करण्याची संधी इऑन मॉर्गनला देण्यात आली. पण कर्णधारपद गेल्यानंतर दिनेशकडून चांगली कामगिरी होताना दिसत नाही. सातत्याने त्याच्या बॅटमधून धावा होताना दिसत नाही. त्यामुळे आजच्या सामन्यात दिनेशला संघातून डच्चू देणार का, याची उत्सुकता चाहत्यांना नक्कीच असेल.
सध्याच्या घडीला केकेआरच्या संघाचे १२ गुण झाले आहेत. एकेकाळी केकेआरचा संघ हा गुणतालिकेत चौथ्या स्थानावर होता आणि त्यांनी ते स्थान काही काळ टिकवून ठेवले होते. पण किंग्स इलेव्हन पंजाबने त्यांना गुणतालिकेत धक्का दिला. त्यामुळे सध्याच्या घडीला केकेआरचा संघ हा गुणतालिकेत पाचव्या क्रमांकावर आहे. त्यामुळे जर केकेआरने आजचा सामना जिंकला तर सात विजयांसह त्यांचे १४ गुण होतील. त्याचबरोबर या विजयासह केकेआरचा संघ पुन्हा एकदा चौथे स्थान पटकावू शकेल.
केकेआरला आपल्या फलंदाजीची चिंता नक्कीच असेल. कारण आतापर्यंत केकेआरला सातत्यपूर्ण फलंदाजी करता आलेली नाही. केकेआरला आतापर्यंत चांगली सलामी मिळालेली नाही. त्याचबरोबर त्यांच्या मधल्या फळीतील फलंदाजांनाही चांगली कामगिरी करता आलेली नाही.त्यामुळे फलंदाजी ही केकेआरसाठी डोकेदुखी असेल. पण केकेआरची गोलंदाजी चांगली होताना दिसत आहे. खासकरून वरुण चक्रवर्ती हा चांगली गोलंदाजी करत आहे.
चेन्नईच्या संघाचे या स्पर्धेतील आव्हान जवळपास संपलेले आहे. त्यामुळे ते बिनधास्त खेळत आहेत. गेल्या सामन्यात चेन्नईच्या संघाने आरसीबीचा आठ विकेट्स राखून दणदणीत विजय मिळवला होता. त्याचबरोबर त्यांचे खेळाडूही आता लयीत आलेले आहेत. त्यामुळे हा सामना जिंकून विजयात सातत्य राखण्याचा चेन्नईचा प्रयत्न असेल.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
