साडेचार हजाराची वाइन पडली अडीच लाखांना

ऑनलाइन दारू मागवणे माहीम येथील चार्टड अकाऊंटंटला चांगलेच महागात पडले आहे. गुगलवर मिळालेल्या वाइन शॉपच्या मोबाइल क्रमांकावर साडेचार हजारांची वाइन मागवण्यात आली. मात्र ती घरपोच मिळण्याऐवजी अडीच लाखांची फसवणूक करण्यात आली. याप्रकरणी माहीम पोलिस ठाण्यात गुन्हा दाखल करण्यात आला आहे.

माहीम येथील चार्टड अकाऊंटंट अजित दातार यांच्या मुलाच्या मित्राचे लग्न होते. मित्राला लग्नामध्ये गिफ्ट म्हणून वाइनची बाटली देण्याचे त्यांच्या मुलाने ठरवले. याबाबत त्याने वडिलांना सांगितले आणि वाइन खरेदी करण्यासाठी त्यांचे स्टँडर्ड चार्टड बँकेचे क्रेडीट कार्ड घेतले. गुगलवर सर्च इंजिनवर शिवाजी पार्क येथील मॉर्डन वाइन शॉपचा मोबाइल क्रमांक मिळाला. या मोबाइल क्रमांकावर संपर्क करताच वाइन शॉप मालक बोलत असल्याचे सांगितले. दातार यांच्या मुलाने साडेचार हजार रुपये किमतीची वाइनची बाटली ऑर्डर केली. मोबाइलवर बोलणाऱ्या वाइन शॉपमधील व्यक्तीने क्रेडिट कार्डवरील १६ अंकी क्रमांक विचारला. त्यानंतर मोबाइलवर आलेला ओटीपी नंबरही मागितला. दातार यांच्या मुलाने हा सर्व तपशील त्या व्यक्तीला दिला. या माहितीचा वापर करून वाइन शॉपमधील व्यक्तीने दोन लाख ४८ हजार रुपये परस्पर वळते केले. याबाबत पोलिसांत तक्रार करतो, असे सांगितल्यावर वाइन शॉपमधील व्यक्तीने मोबाइल बंद केला. फसवणूक झाल्याचे लक्षात येताच दातार आणि त्यांच्या मुलाने शिवाजी पार्क येथील मॉर्डन वाइन शॉप गाठले. फोन करणाऱ्या नावाचा व्यक्ती त्या शॉपमध्ये होता; मात्र त्यांनी संपर्क केलेला मोबाइल क्रमांक आमच्यापैकी कुणाचाही नसल्याचे वाइन शॉपच्या मालकाने सांगितले. दातार यांनी अखेर माहीम पोलिस ठाणे गाठले आणि याबाबत तक्रार केली.