इनसायडर ट्रेडिंगचा ठपका; ​​'किर्लोस्कर'च्या संचालकांवर सेबीचा कारवाईचा बडगा

मुंबई : राज्यातील आघाडीचा उद्योग समूह असलेल्या किर्लोस्कर समूहावर सेबीने कारवाई केली आहे. संचालक मंडळाच्या बैठकीतील गोपनीय माहितीचा गैरवापर करत शेअरमध्ये व्यवहार करुन () सामान्य भागधारकांची फसवणूक केल्याचा ठपका ‘किर्लोस्कर’मधील काही संचालकांवर ठेवण्यात आला आहे. नुकताच याबाबत भांडवली बाजार नियंत्रक सेबीने निर्णय दिला असून त्यात किर्लोस्कर इंडस्ट्रीजचे (केआयएल) संचालक, ए. एन.अलवानी यांना सेबीने १५ लाख रुपयांचा दंड ठोठावला असून अन्य काही संचालकांवर भांडवली बाजारात सहा महिने बंदी घातली आहे. २०१० मध्ये हा गैरप्रकार घडला होता.

किर्लोस्कर इंडस्ट्रीजचे (केआयएल) संचालक, ए. एन.अलवानी यांनी आपल्या वैयक्तिक ट्रेडिंग अकाऊंटमधून शेअर्सचा व्यवहार केला नसला तरी त्यांच्याकडे ‘यूपीएसआय’चा ताबा असल्याने ते इनसाइडर होते. ते किर्लोस्कर इंडस्ट्रीज (केआयएल) च्या वतीने अधिकृत “एजंट” म्हणून व्यापार करीत होते, असे सेबीने आपल्या निकालपत्रात म्हटलं आहे.

२७ जुलै २०१० रोजी झालेल्या केबीएलच्या बोर्डाच्या बैठकीत व्यवस्थापनाने केबीएलच्या कमजोर नफ्याची गोष्ट उघडकीस आणली. सेबीच्या नियमांनुसार ही अतीशय गोपनीय माहिती आणि ‘यूपीएसआय’सुद्धा आहे. या मंडळाच्या बैठकीस हजेरी लावणारे केबीएल संचालक गौतम कुलकर्णी, राहुल किर्लोस्कर आणि ए.एन. अलवाणी हे या ‘यूपीएसआय’मध्ये गुप्तपणे होते. दुसर्‍याच दिवशी २८ जुलै रोजी किर्लोस्कर इंडस्ट्रीजच्या बोर्डाच्या बैठकीत अध्यक्ष अतुल किर्लोस्कर, राहुल किर्लोस्कर यांचा भाऊ, यांनी एक नवीन गोष्टीचा समावेश केला जी गोष्ट अजेंडामध्ये नव्हती. त्यांनी असे सुचविले की किर्लोस्कर इंडस्ट्रीज ने केबीएल समभाग खरेदी करून आपल्या अतिरिक्त निधीची गुंतवणूक करावी. त्यांनी केबीएल चांगली कामगिरी करेल असे खोटे प्रतिनिधित्व केले ही अतिशय धक्कादायक बाब आहे.

किर्लोस्कर इंडस्ट्रीजने केबीएल शेअर्स खरेदी करावे हे सुचविल्या नंतर अतुल किर्लोस्कर आणि निहाल कुलकर्णी विक्रेते म्हणून थेट रस घेत होते. अतुल किर्लोस्कर यांच्या अनुपस्थितीत ए. एन. अलवानी, मंडळाच्या बैठकीचे अध्यक्षपद असलेले तत्कालीन अध्यक्ष ए. आर. साठे आणि अन्य संचालक यांनी केबीएल समभाग खरेदी करण्यासाठी दोन गटात मतदान केले.

सेबीने म्हटले आहे, की किर्लोस्कर इंडस्ट्रीजच्या ऑडिट कमिटीचे अध्यक्ष असलेले अलावानी हे केबीएल बोर्डवर देखील होते आणि ते कार्यकारी संचालक नसल्याने त्यांना केबीएलशी जोडलेली व्यक्ती ठरविले गेले आहे. त्यामुळे हे अपेक्षित आहे की केबीएलच्या अप्रकाशित किंमतीची संवेदनशील माहिती मिळवण्याचा स्रोत त्यांच्याकडे होता. त्यांनी किर्लोस्कर इंडस्ट्रीज बोर्ड बैठकीत भाग घेतला होता आणि यूपीएसआय एक्सेस आणि प्रत्यक्ष सहभागाद्वारे त्यांनी केआयएलला, केबीएलचे शेअर्स खरेदी करण्यास उद्युक्त केले असे सिद्ध होते.

आदल्या दिवशी केबीएलच्या कमकुवत नफ्याबद्दल ऐकूनही अलवानी यांनी अन्य संचालकांना किर्लोस्कर इंडस्ट्रीद्वारे केबीएलच्या शेअर्समध्ये गुंतवणूक करणे चुकीचे ठरेल असे सांगितले नाही, याचबरोबर प्रत्यक्ष सहभागी होऊन शेअर्स खरेदी करण्यास मतदान केले. हे शेअर्स दीर्घ मुदतीसाठी खूपच कमी नफा असणारे होते. कंपनीच्या १५ टक्के मालक असलेल्या प्रमोटर्सना त्यांनी २७५ कोटी रुपयांच्या शेअर्स गुंतवणुकीमध्ये मदत केली. इनसायडर ट्रेडिंग आणि भागधारकांची फसवणूक केल्याप्रकरणी गौतम कुलकर्णी, राहुल किर्लोस्कर, अतुल किर्लोस्कर, अल्पना किर्लोस्कर, ज्योत्स्ना कुलकर्णी आणि आरती किर्लोस्कर यांनाही सेबीने ४५ दिवसांमध्ये ३१.२१ कोटी रुपये भरण्याचे आदेश दिले आहेत. याचबरोबर त्यांना भांडवली बाजारात ६ महिन्यांची बंदी घालण्यात आली आहे