म. टा. प्रतिनिधी, नागपूरः मुलाच्या दारूच्या व्यसनाला कंटाळलेल्या जन्मदात्यांनीच मुलाचा गळा आवळला. ही घटना रामटेक पोलिस ठाण्याच्या हद्दीतील मौजा हिवरा येथे शनिवारी पहाटेच्या सुमारास घडली. उद्धल तुळशीराम चौधरी (वय ४२, रा. हिवरा) आणि माया उद्धल चौधरी (वय ३६, रा. हिवरा) अशी या आरोपींची नावे आहेत. त्यांच्यावर मुलगा अतुल उद्धल चौधरी (वय २२ रा. हिवरा) याच्या हत्येचा आरोप आहे.
उद्धल आणि माया हे मजुरी करतात. अतुलला दारूचे व्यसन होते. दारुच्या नशेत तो आई वडिलांना शिवीगाळ व मारहाण करीत असे. शनिवारी रात्री तो दारू पिऊन आला. त्याने परत आई वडिलांशी वाद घालण्यास सुरुवात केली. त्याने आईला विळी फेकून मारली तसेच दोघांनाही जिवे ठार मारण्याची धमकी दिली. अतुलच्या नेहमीच्या त्रासाला कंटाळलेल्या जन्मदात्यांनी अखेर त्याला गळा आवळला आणि त्याची जीवनयात्रा संपविली. आरोपींनी गुन्ह्याची कबुली दिली आहे. पोलिसांनी आरोपींवर गुन्हा दाखल करून त्यांना अटक केली आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
