म.टा.प्रतिनिधी, नगर: कोणत्याही परिस्थितीत ओबीसी प्रवर्गात मराठा समाजाचा समावेश करू नये, अशी मागणी जय भगवान महासंघाने मुख्यमंत्री उद्धव ठाकरे यांच्याकडे केली आहे. मराठा समाजाची ओबीसीकरण करू नये व ओबीसीच्या आरक्षणाचे संरक्षण करावे, असेही महासंघाने स्पष्ट केले आहे. नगरच्या जिल्हाधिकारी कार्यालयासमोर घोषणाबाजी करीत जिल्हा प्रशासनाच्या मार्फत तसे निवेदनही महासंघाने मुख्यमंत्री ठाकरे यांच्यासह उपमुख्यमंत्री अजित पवार , मंत्री छगन भुजबळ, विजय वडेट्टीवार यांना पाठवले आहे.

मराठा आरक्षणाला सुप्रीम कोर्टात स्थगिती मिळाल्यामुळे काही मराठा समाजातील नेते व संघटना जाहीरपणे ओबीसी प्रवर्गात मराठा समाजाला आरक्षण देण्याची मागणी करीत आहे. त्यामुळे ओबीसी व भटके विमुक्त समाजात संतापाची लाट उसळली आहे, असे जय भगवान महासंघाने स्पष्ट करतानाच आपल्या विविध मागण्यांचे निवेदन मुख्यमंत्री उद्धव ठाकरे यांना जिल्हा प्रशासनामार्फत पाठवले आहे. या निवेदनामध्ये, कोणत्याही परिस्थितीत ओबीसी या प्रवर्गात मराठा जातीचा समावेश होऊ नये, अशी प्रमुख मागणी महासंघाने केली आहे.

तसेच २०२१ ची सार्वत्रिक जनगणना केंद्रसरकार जातीनिहाय करणार नसेल तर राज्य सरकार मार्फत राज्यात जातीनिहाय जनगणना करण्यात यावी, पुढे ढकलण्यात आलेल्या एमपीएससी वा अन्य सर्व प्रकारच्या परीक्षा कोणाच्याही दबावाची पर्वा न करता ताबडतोब घेण्यात याव्यात, अकरावीची प्रवेश प्रक्रिया विनाविलंब सुरू करण्यात यावी, सरकारी सेवांमधील ओबीसींचा अनुशेष लवकरात लवकर भरण्यात यावा , ओबीसी समाजाचे चंद्रपूर, गडचिरोली, यवतमाळ, नंदुरबार, धुळे, ठाणे, नाशिक व पालघर जिल्ह्यातील आरक्षण पूर्ववत १९ टक्के करण्यात यावे. सरकारी सेवेतील ओबीसी कर्मचाऱ्यांना पदोन्नतीत आरक्षण लागू करावे, ओबीसी समाजासाठी घरकुल योजना सुरू करण्यात यावी, अशी मागणी संघटनेच्या वतीने करण्यात आली आहे. संघटनेचे प्रदेश उपाध्यक्ष आनंद लहामगे, जिल्हाध्यक्ष रमेश सानप, उपाध्यक्ष मदन पालवे, शहराध्यक्ष अमोल डापसे यांच्यासह पदाधिकाऱ्यांनी हे निवेदन मुख्यमंत्र्यांना पाठवले आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here