बिनकामाची पन्नाशी; भाजपची सरकारवर टीका

मुख्यमंत्री उद्धव ठाकरे यांच्या नेतृत्वाखालील तीन पक्षांच्या महाविकास आघाडी सरकारच्या राजवटीला ५० दिवस पूर्ण झाले असून, हे ‘महाभकास’ आघाडीचे सरकार असल्याचा आरोप प्रदेश भाजपने सोशल मीडियावर केला आहे. ‘तत्कालीन मुख्यमंत्री देवेंद्र फडणवीस यांच्या नेतृत्वाखालील सरकार म्हणजे सुप्रशासन, कायदा व सुव्यवस्थेसाठी शिवशाहीची किनार, तर ठाकरे यांच्या नेतृत्वाखालील सरकार म्हणजे बिनकामाची पन्नाशी, आता सामान्य जनतेलाही पडतोय मार’, अशा शब्दांत नव्या सरकारचे भाजपने वर्णन केले आहे.

मुख्यमंत्री शिवसेनेचाच होणार हे अभिवचन आपण शिवसेनाप्रमुख बाळासाहेब ठाकरे यांना दिले असून, ते प्रत्यक्षात आणणार, असा ठाम इरादा शिवसेना पक्षप्रमुख उद्धव ठाकरे यांनी विधानसभा निकालानंतर केला होता. मुख्यमंत्रिपदावरून भाजप-शिवसेना पक्षांतील वाद शिगेला गेल्यानंतर युतीत काडीमोड झाला. अखेर शिवसेनेने दोन्ही काँग्रेससोबत महाविकास आघाडीचे नवे सत्ता समीकरण तयार करून राज्यात सरकार स्थापन केले. तथापि, आणि शिवसेना यांच्यातील सत्तेच्या साठमारीचा कलगीतुरा सुरू असल्याचे भाजपच्या सोशल मीडियावरील टीकेवरून दिसते.

नवे सरकार विराजमान होऊन ५० दिवस झाले आहेत. यानिमित्त भाजपने मुख्यमंत्री उद्धव ठाकरे आणि माजी मुख्यमंत्री देवेंद्र फडवणीस यांच्यातील कामांची तुलना केली आहे. सोशल मीडियावर भाजपने ‘बिनकामाची पन्नाशी’ अशा शब्दांत सत्ताधाऱ्यांवर टीका केली आहे. फडवणीस सरकार विरुद्ध ‘महाभकास आघाडी सरकार’, असे ट्वीट भाजप महाराष्ट्रकडून करण्यात आले आहे. फडवणीस सरकारने शेतकऱ्यांना कर्जमाफी, जलयुक्त शिवार, छत्रपती शिवाजी महाराज यांचे स्मारक, हिंदुहृदयसम्राट बाळासाहेब ठाकरे स्मारकाला मंजुरी, नवी मुंबईतील विमानतळ, आरक्षणाचे प्रलंबित प्रश्न यांसह अनेक निर्णयांची यादीच केली आहे.

‘फसव्या कर्जमाफीने शेतकऱ्यांचा सातबारा उतारा कोरा झालाच नाही. मंत्र्यांची दालने, बंगले यासाठीच बैठका होत आहेत. प्रशासनाला सुस्ती, मलाईदारीसाठी साऱ्यांचीच मस्ती, फक्त महाआघाडी बैठका, भाजपला दूर ठेवण्यासाठी, गतिमान विकास थांबून स्वतःचे खिसे गरम करण्यासाठी’, अशा शब्दांत प्रदेश भाजपने केली आहे. एकूणच ५० दिवसांच्या कारभारावरून भाजपने सोशल मीडियात ‘महाभकास आघाडी सरकार’ अशी शेलकी विशेषणे बहाल करताना दोन्ही काँग्रेसपेक्षा मुख्यमंत्री उद्धव ठाकरे यांनाच अधिक लक्ष्य केल्याचे भाजप महाराष्ट्रच्या ट्विटर अकाऊंटवर दिसते.