… म्हणून प्रिया वर्मा ट्विटरवर झाल्या ट्रेंड

रविवारी सायंकाळी अचानक #प्रियावर्मा हा ट्रेंड सुरू झाला. एक व्हिडीओ व्हायरल झाल्यामुळे हे सर्व सुरू झालं. एक महिला आंदोलनकर्त्याला पकडते आणि कानशिलात लगावते, असं या व्हिडीओत स्पष्टपणे दिसतं. ही महिला दुसरी तिसरी कुणी नसून मध्य प्रदेशातील राजगडच्या उपजिल्हाधिकारी आहेत.

वृत्तसंस्था ‘एएनआय’ने हा व्हिडीओ शेअर केला होता. एका ठिकाणी पोलीस आणि आंदोलनकर्त्यांमध्ये झटापट होत असल्याचं व्हिडीओत दिसतं, जिथे प्रिया वर्माही उपस्थित होत्या. एका आंदोलनकर्त्याने प्रिया वर्मा यांचे केस ओढले आणि धक्काबुक्की केली.

काय आहे संपूर्ण प्रकरण?
राजगडमध्ये कलम १४४ लागू करण्यात आलं आहे. यानंतरही भाजपच्या काही कार्यकर्त्यांनी बरौरा भागात नागरिकत्व दुरुस्ती कायद्याच्या समर्थनार्थ रॅली काढली. याचवेळी हा सर्व प्रकार घडला.

याच घटनेचा दुसरा व्हिडीओही समोर आला. यात प्रिया वर्मा यांच्याव्यतिरिक्त आणखी एक महिला आंदोलकांशी बोलताना दिसत आहे. मध्य प्रदेशचे माजी मुख्यमंत्री शिवराज सिंह चौहान यांनी हा व्हिडीओ शेअर केला आहे. ही दुसरी महिला राजगडच्या जिल्हाधिकारी निधी निवेदिता आहेत. हा व्हिडीओ शेअर करताना शिवराज सिंह चौहान म्हणाले, ‘कलेक्टर मॅडम, तुम्ही कायद्याचं कोणतं पुस्तक वाचलं आहे, ज्यात शांततापूर्ण मार्गाने सुरू असलेल्या आंदोलनात घुसून आंदोलकांना मारण्याचा आणि ओढण्याचा अधिकार तुम्हाला मिळाला?’

ट्विटरवर ट्रेंड सुरू असताना या घटनेत आरोप आणि प्रत्यारोप होत होते. काही लोकांनी कमलनाथ सरकारच्या कारवाईवर प्रश्नचिन्ह उपस्थित केलं, तर काहींनी प्रिया वर्मा यांचं समर्थन केलं.

कोण आहेत प्रिया वर्मा?
प्रिया वर्मा या मध्य प्रदेशातील इंदूरजवळील मांगलिया गावच्या आहेत. वयाच्या २१ व्या वर्षीच त्या डीएसपी झाल्या. सध्या त्या उपजिल्हाधिकारी आहेत. ट्विटरवर ट्रेंड सुरू असताना लोकांनी प्रिया वर्मा यांचे जुने फोटोही शेअर केले.

या सर्व घटनेनंतर प्रिया वर्मा यांना धक्का देणे आणि केस ओढल्याप्रकरणी दो जणांवर गुन्हा दाखल करण्यात आला आहे.