शारजा : मुंबईकर श्रेयस अय्यरने आजच्या अंतिम सामन्यात मुंबई इंडियन्सच्या गोलंदाजीची चांगलीच धुलाई केली. श्रेयस अय्यर आणि रिषभ पंत यांच्या धडाकेबाज अर्धशतकांच्या जोरावर दिल्ली कॅपिटल्सच्या संघाला मुंबई इंडियन्सपुढे १५७ धावांचे आव्हान ठेवता आले होते. आयपीएलच्या आजच्या अंतिम फेरीत दिल्लीची ३ बाद २२ अशी अवस्था झाली होती. पण त्यानंतर अय्यर आणि पंत या दोघांनी अर्धशतके साकारत मुंबईच्या गोलंदाजीवरच जोरदार हल्ला चढवला. या दोघांच्या दमदार फटकेबाजीमुळेच दिल्लीला मुंबईपुढे हे सन्मानजनक आव्हान ठेवता आले. श्रेयस अय्यरने यावेळी नाबाद ६५ धावांची धडाकेबाज खेळी साकारली.

दिल्ली कॅपिटल्सच्या संघाने नाणेफेक जिंकली आणि प्रथम फलंदाजी करण्याचा निर्णय घेतला. पण पहिल्याच चेंडूवर दिल्लीला धक्का बसल्याचे पाहायला मिळाले. मुंबईचा वेगवान गोलंदाज ट्रेंट बोल्टने यावेळी सामन्याच्या पहिल्याच चेंडूवर दिल्लीचा सलामावीर मार्कस स्टॉइनिसला बाद केले आणि दिल्लीला धक्का दिला. पहिल्याच चेंडूवर धक्का बसल्यावर दिल्लीचा अजिंक्य रहाणे फलंदाजीला आला. पण बोल्टने त्यानंतरच्या तिसऱ्या षटकात बोल्टने पुन्हा एकदा दिल्लीला धक्का दिला. बोल्टने यावेळी अजिंक्यला बाद करत दिल्लीला दुसरा धक्का दिला. अजिंक्यला यावेळी दोन धावांवरच समाधान मानावे लागले.

दिल्लीने दोन फलंदाज लवकर बाद झाले होते. त्यावेळी संघाची जबाबदारी सलामीवीर शिखर धवनवर होती. कारण धवनने आतापर्यंत दमदार फलंदाजी करत बऱ्याचदा संघाला सावरले होते. पण पहिल्या तीन षटकांमध्ये धवनला मोठी फटकेबाजी करता आली नव्हती. त्यामुळे धवन या षटकात जोखीम उचलणार, हे रोहितला चांगलेच माहित होती. त्यामुळेच रोहितने हे षटक जयंतला दिले होते. जयंतनेही यावेळी आपल्याला मिळालेल्या संधीचे सोने केले. जयंतने आपल्या या षटकातील तिसऱ्या चेंडूवर धवनचा काटा काढून मुंबईच्या संघाला मोठे यश मिळवून दिले होते. धवनने यावेळी १५ धावा केल्या.

नाणेफेक जिंकून प्रथम फलंदाजी करणाऱ्या दिल्लीच्या संघाची ३ बाद २२ अशी अवस्था झाली होती. त्यावेळी दिल्लीचा कर्णधार श्रेयस अय्यर आणि रिषभ पंत यांनी संघाला डाव सावरल्याचे पाहायला मिळाले. सहाव्या षटकातील तिसऱ्या चेंडूवर इशानने दिल्लीचा कर्णधार श्रेयस अय्यरचा झेल सोडला. त्यावेळी इशानला दुखापत झाली आणि त्याला मैदान सोडावे लागले. अय्यर यावेळी १४ धावांवर होता. या जीवदानाचा चांगलाच फायदा अय्यरने घेतला आणि त्यानंतर त्याने दमदार फलंदाजी केली.

पंत यावेळी अय्यरपेक्षा जास्त आक्रमक फलंदाजी करत होता. पंतने यावेळी चौकारासह आपले अर्धशतक झळकावले. पण पंतला अर्धशतक झळकावल्यावर जास्त काळ फलंदाजी करता आली नाही. पंतने यावेळी ३८ चेंडूंत ४ चौकार आणि दोन षटकाराच्या जोरावर ५६ धावा केल्या. श्रेयसनेही यावेळी ४० चेंडूंत आपले अर्धशतक साजरे केले, त्याचे हे या स्पर्धेतील तिसरे अर्धशतक ठरले.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here