विराट कोहलीच्या नेतृत्वाखालील भारतीय संघ ऑस्ट्रेलियाच्या दौऱ्यासाठी रवाना, रोहित शर्मा मात्र संघाबरोबर नाही

दुबई : विराट कोहलीच्या नेतृत्वाखालील भारतीय संघ काही मिनिटांपूर्वीच ऑस्ट्रेलियाच्या दौऱ्यासाठी रवाना झाला आहे. भारताचे मुख्य प्रशिक्षक रवी शास्त्री हेदेखील यावेळी भारतीय संघाबरोबर असल्याचे पाहायला मिळाले. पण रोहित शर्मा मात्र या संघाबरोबर नव्हता. रोहित भारतीय संघाबरोबर ऑस्ट्रेलियाच्या दौऱ्यावर जाणार नसल्याचे समजते आहे.

बीसीसीआयने भारतीय संघाचे काही फोटो आपल्या ट्विटर हँडलवर पोस्ट केले आहेत. यामध्ये ऑस्ट्रेलियाच्या दौऱ्यावर जाणारे भारतीय संघातील सर्व सदस्य दिसत आहेत. पण यामध्ये रोहित शर्मा मात्र दिसत नाही. रोहित हा संघाबरोबर ऑस्ट्रेलियाच्या दौऱ्यावर जाणार नाही. रोहित हा युएईमधून भारतामध्ये येणार असल्याचे दिसत आहे.

रोहितदेखील या संघाचा एक भाग आहे. पण रोहित भारतीय संघाबरोबर न जाता भारतामध्ये येणार आहे. भारतामध्ये रोहित मुंबईत दाखल होणार आहे. आपल्या कुटुंबियांसमवेत रोहित यावेळी दिवाळी साजरी करणार असल्याचेही समजत आहे. त्यानंतर रोहित हा बंगळुरुला राष्ट्रीय क्रिकेट अकादमीमध्ये जाणार आहे. तिथे गेल्यावर रोहितला तंदुरुस्ती चाचणी द्यावी लागणार आहे. या चाचणीत रोहित जर पास झाला तरच त्याला ऑस्ट्रेलियाच्या दौऱ्यावर जाता येणार आहे.

भारतीय संघ १२ नोव्हेंबरला सकाळी ऑस्ट्रेलियाला पोहोचल्यावर त्यांची याच दिवशी करोना चाचणी करण्यात येणार आहे. या करोना चाचणीचे अहवाल तात्काळ भारतीय संघाला मिळू शकतात. या करोना चाचणीमध्ये जे खेळाडू निगेटीव्ह सापडतील त्यांना १३ नोव्हेंबरपासून सराव करता येणार आहे. त्यामुळे ऑस्ट्रेलियाला पोहोचल्यावर भारतीय संघ दुसऱ्याच दिवशी सराव करू शकतो, असे बीसीसीआयमधील सूत्रांनी एएनआय या वृत्तसंस्थेला सांगितले आहे.

भारताचा ऑस्ट्रेलियाचा दौरा २७ नोव्हेंबरपासून सुरु होणार आहे. भारत आणि ऑस्ट्रेलिया यांच्यामध्ये पहिल्यांदा तीन एकदिवसीय सामन्यांची मालिका खेळवण्यात येणार आहे. ही एकदिवसीय मालिका २७ नोव्हेंबर ते २ डिसेंबर या कालावधीमध्ये खेळवली जाणार आहे. त्यानंतर भारत आणि ऑस्ट्रेलिया यांच्यामध्ये ४ ते ८ डिसेंबर या कालावधीमध्ये ट्वेन्टी-२० सामन्यांची मालिका खेळवण्यात येणार आहे.

ऑस्ट्रेलिया दौऱ्यातील कसोटी मालिकेला १७ डिसेंबरला सुरुवात होणार आहे. भारत आणि ऑस्ट्रेलिया यांच्यातील पहिला सामना अॅडलेड येथे १७ डिसेंबरपासून रंगणार आहे. त्यानंतर दुसरा कसोटी सामना २६ डिसेंबरपासून मेलबर्न येथे होणार आहे. तिसरा कसोटी सामना ७ जानेवारी २०२१ या दिवशी सिडनी येथे सुरु होणार आहे, तर मालिकेतील अखेरचा आणि चौथा कसोटी सामना १५ जानेवारीला ब्रिस्बेन येथे खेळवण्यात येणार आहे. कोहलीच्या घरी जानेवारी महिन्यात पाळणा हलणार असल्यामुळे तो सिडनी आणि ब्रिस्बेन या दोन कसोटी सामन्यांमध्ये खेळू शकणार नाही, असे म्हटले जात आहे.