सुस्साट जा… 'ईस्टर्न फ्री वे' आता थेट ठाण्यापर्यंत

ठाणे आणि मुंबई महानगर प्रदेशातील अन्य शहरांमधील प्रलंबित पायाभूत सुविधांच्या प्रकल्पांना गती देण्याचे निर्देश नगरविकास मंत्री यांनी सोमवारी एमएमआरडीएला दिले. यामध्ये पूर्व मुक्त मार्गाचा घाटकोपरपासून ठाण्यापर्यंत विस्तार करण्याचा बहुप्रतिक्षित प्रकल्प पुन्हा एकदा रूळावर येण्याची चिन्हे आहेत. जवळपास पाच वर्षांपासून हा प्रकल्पविस्तार विविध कारणांमुळे रखडला होता. विशेष म्हणजे, आणखी सहा प्रकल्पांना गती देण्याच्या सूचना यावेळी देण्यात आल्या आहेत.

मुंबई महानगर प्रदेशातील विविध भागात विकासाला चालना देण्याच्या दृष्टीने नगरविकास मंत्री एकनाथ शिंदे सक्रिय झाले आहेत. सोमवारी एमएमआरडीए अधिकाऱ्यांनी एकनाथ शिंदे यांच्यासमोर एमएमआर विभागातील नियोजित तसेच सुरू असलेल्या सर्व प्रकल्पांबाबत सविस्तर सादरीकरण केले. यावेळी विस्तार या प्रकल्पासोबत तीन हात नाका रिमॉडेलिंग, आनंद नगर नाका ते साकेत एलिव्हेटेड महामार्ग, कोपरी ते पटणी खाडी पूल, कोलशेत ते गायमुख खाडी मार्ग, तसेच कोलशेत, कासारवडवली आणि गायमुख येथे खाडीपलीकडील भागांना जोडणारे खाडी पूल, नवीन ठाणे ग्रोथ सेंटर आदी महत्त्वाच्या प्रकल्पांची माहिती देण्यात आली. यावेळी सर्व प्रकल्पांच्या जलद अंमलबजावणीसाठी नोडल अधिकाऱ्याची नियुक्ती करण्याचे निर्देश मंत्री शिंदे यांनी एमएमआरडीए आयुक्त आर. ए. राजीव यांना दिले आहेत.

पुणे, नाशिक, अहमदाबाद, जेएनपीटी अशा विविध ठिकाणांकडे जाणारी सर्व वाहतूक ठाणे शहरातून जात असल्यामुळे ठाण्यातील रस्त्यांवर मोठ्या प्रमाणावर वाहतूक कोंडी होते. नागपूर-मुंबई समृद्धी महामार्गाचा शेवट ठाण्याजवळ होणार आहे. तसेच भिवंडी व कल्याण परिसरात एमएमआरडीएमार्फत ग्रोथ सेंटर विकसित करण्यात येणार असल्यामुळे वाहतुकीची समस्या अधिकच बिकट होणार आहे. या बाबी लक्षात घेऊन या प्रकल्पांची आखणी करण्यात आली आहे. ‘या प्रकल्पांच्या जलद अंमलबजावणीमुळे वाहतूक कोंडीची समस्या कायमस्वरूपी निकाली निघेल,’ असा विश्वास एकनाथ शिंदे यांनी व्यक्त केला. भविष्यातील वाढ लक्षात घेऊन या सर्व प्रकल्पांचे नियोजन केले आहे, असेही त्यांनी स्पष्ट केले.

कल्याण मेट्रोचे सुधारित आरेखन
ठाणे-भिवंडी-कल्याण मेट्रोच्या सुधारित आराखड्यात भिवंडी ते कल्याण टप्प्याच्या आरेखनाबाबत अनेक तक्रारी होत्या. कल्याणचा फार थोडा भाग मेट्रोने जोडला जाणार असल्यामुळे बहुसंख्य कल्याणवासी या मेट्रोपासून वंचित राहिले असते. त्यामुळे या मार्गाचे आरेखन बदलण्याचे निर्देश शिंदे यांनी एमएमआरडीएला यापूर्वी दिले होते. त्यानुसार सुधारित आरेखन तयार करण्यात आले आहे. त्यामुळे तातडीने या प्रकल्पाला गती देण्याचे निर्देश शिंदे यांनी पुन्हा एकदा दिले आहेत.

पूर्व मुक्त मार्ग विस्ताराला गती
दक्षिण मुंबईतून पूर्व उपनगरांना जोडणारा पूर्व मुक्त मार्ग तीन किमीने वाढवून आता पूर्व द्रुतगती मार्गाला जोडण्याचा प्रस्ताव पाच वर्षांपूर्वी मुंबई महानगर विकास प्राधिकरणाच्या (एमएमआरडीए) विचाराधीन होता. मात्र या मार्गात येणाऱ्या दोन हजार झोपड्यांचे पुनर्वसन करण्याचे मोठे आव्हान प्राधिकरणासमोर होते. तांत्रिक कारणांमुळे या विस्ताराचे काम सुरू होण्यास आणखी एक वर्ष लागेल, असे त्यावेळी स्पष्ट करण्यात आले होते. आता नगरविकास मंत्री एकनाथ शिंदे यांनी निर्देश दिल्यानंतर हे काम पुन्हा अधिक गतीने सुरू होईल, अशी आशा व्यक्त करण्यात येत आहे. याबाबत नेमके नियोजन कसे असेल, हे जाणून घेण्यासाठी एमएमआरडीए अधिकाऱ्यांना संपर्क साधण्याचा प्रयत्न केला असता, तो होऊ शकला नाही.