मिळालेल्या माहितीनुसार, समितीचे अध्यक्ष कांताराम गिलबिले (वय ५०) यांनी मंदिरात चोरी झाल्याची तक्रार पोलिसांत दिली. ते रविवारी सकाळी मंदिरात पूजेसाठी गेले होते. त्यावेळी त्यांना दरवाजाला लावलेले कुलूप तुटलेले दिसले. त्यांनी शनिवारी पूजेनंतर दरवाजाला कुलूप लावलेले होते. रविवारी ते मंदिरात गेले असता, आतमधील दोन दानपेट्या गायब असल्याचे त्यांच्या निदर्शनास आले. त्यांनी आजूबाजूला पाहणी केली असता, मंदिराचे कुलूप तोडण्यासाठी चोरट्यांनी वापरलेली सळई दिसून आली.
या दानपेट्यांमध्ये किती रक्कम होती, याबाबत माहिती मिळू शकली नाही. शिक्रापूर येथील कोयाळी गावठाण परिसरातील भैरवनाथ मंदिरात चोरी झाल्याची माहिती पोलिसांनी दिली. मंदिर समितीच्या अध्यक्षांनी या प्रकरणी पोलिसांत तक्रार दिली आहे, असेही त्यांनी सांगितले. चोरट्यांना या परिसराबद्दल माहिती असावी, असा प्राथमिक अंदाज पोलिसांनी व्यक्त केला असून, पुरावे आणि सीसीटीव्ही फुटेज तपासले जात असल्याची माहिती त्यांनी दिली. या प्रकरणी पोलिसांनी अज्ञात चोरट्यांविरोधात गुन्हा दाखल केला आहे. वृत्त हाती आले तोपर्यंत या प्रकरणी कुणालाही अटक करण्यात आली नव्हती.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
