सलग दोन महिने महागाईत वाढ; किरकोळ महागाईचा ऑक्टोबरमध्ये उच्चांक

वृत्तसंस्था, नवी दिल्ली : भाज्या आणि अंडी यांचे भडकलेले भाव यांमुळे मुख्यतः दर ऑक्टोबरमध्ये उच्चांकी पोहोचला आहे. रिटेल चलनवाढ ७.६१ टक्के झाली असून, हा चलनवाढीचा साडेसहा वर्षांतील उच्चांक आहे. यामुळे रिझर्व्ह बँकेपुढे पतधोरण आढाव्यामध्ये दरकपातीबाबत निर्णय घेताना दबाव वाढणार आहे. सरकारने गुरुवारी ग्राहक किंमत निर्देशांक (सीपीआय) प्रसिद्ध केला. त्यानुसार, सप्टेंबर महिन्यात रिटेल चलनवाढ ७.२७ टक्के झाली होती. आता ऑक्टोबरमध्येही रिटेल चलनवाढ ७.६१ टक्के झाली आहे. रिटेल महागाई ७ टक्क्यांवर असण्याची ही दुसरी वेळ आहे. यापूर्वी मे २०१४ मध्ये ही चलनवाढ ८.३३ टक्क्यांवर गेली होती.

ग्राहक खाद्यपदार्थ किंमत निर्देशांक (सीएफपीआय) ऑक्टोबरमध्ये ११.०७ टक्के झाला आहे, जो सप्टेंबरमध्ये १०.६८ टक्के होता. गेल्यावर्षी ऑक्टोबरमध्ये तो ४.६२ टक्के होता.

ऑक्टोबर महिन्यात वार्षिक आधारावर भाज्यांच्या किमतीत २२.५१ टक्के वाढ झाली आहे. याच महिन्यात मांस आणि मासे यांचे भाव १८.७० टक्के, अंड्यांचे भाव २१.८१ टक्के वाढले आहेत. इंधनाच्या दरांमध्ये मात्र किंचित घट झाल्यामुळे इंधनांचे दर २.२८ टक्के वधारले आहेत. सप्टेंबरमध्ये हे दर २.८७ टक्के वधारले होते. दूध व दुधाचे पदार्थ यांचे भाव सप्टेंबरमध्ये ५.६४ टक्के वाढले होते. त्यामध्ये किंचित घट होऊन ऑक्टोबरमध्ये ते ५.२० टक्के वाढले आहेत.