बिहार काँग्रेसच्या नवनिर्वाचित आमदार बैठकीत जोरदार हाणामारी

पाटणा : नुकत्याच जाहीर झालेल्या बिहार विधानसभा निवडणूक निकालानंतर (Bihar Assembly Election Results 2020) एकीकडे राज्यात नवं सरकार स्थापणेसाठी एनडीएचे जोरदार प्रयत्न सुरू आहेत. तर दुसरीकडे बिहार काँग्रेसच्या नवनिर्वाचित आमदारांच्या बैठकीत शुक्रवारी झालेली पाहायला मिळाली. गटनेता निवडीवरून हा वाद उभा राहिला.

बैठकीत नवनिर्वाचित काँग्रेस उमेदवार विजय शंकर दुबे यांना ‘चोर’ म्हटल्यानंतर सुरु झालेली बाचाबाची हाणामारीपर्यंत पोहचली.

बिहार निवडणुकीनंतर शुक्रवारी राज्याची राजधानी पाटणामध्ये पुढच्या आखणीसाठी काँग्रेस नवनिर्वाचित आमदारांची एक बैठक बोलावण्यात आली होती. काँग्रेसचं मुख्यालय असलेल्या सदाकत आश्रमात आज ही बैठक भरली होती.

या बैठकीसाठी काँग्रेसचे सर्व नवनिर्वाचित आमदारही हजर झाले होते. परंतु, या बैठकीत नेत्यांचे आपांपसातील वाद स्पष्टपणे समोर आले.

काँग्रेस गटनेता बनण्यासाठी सुरू झालेल्या स्पर्धेनंतर उभा राहिलेला वाद पहिल्यांदा शिवीगाळ आणि नंतर मारामारीपर्यंत पोहचला.

महाराजगंज मतदारसंघाचे विजयी उमेदवार विजय शंकर दुबे आणि विक्रम मतदारसंघाचे विजयी उमेदवार सिद्धार्थ यांच्यात काँग्रेस गटनेता बनण्यासाठी हा वाद झाला.

वाचा : वाचा :

मिळालेल्या माहितीनुसार, सिद्धार्थ यांच्या समर्थकांकडून विजय शंकर दुबे यांना ‘चोर’ असं संबोधण्यात आलं. यामुळे हा वाद आणखीनच पेटला.

उल्लेखनीय म्हणजे, या बैठकीत छत्तीसगडचे मुख्यमंत्री भूपेश बघेल आणि काँग्रेसच्या स्क्रिनिंग कमिटीचे अध्यक्ष अविनाश पांडेदेखील उपस्थित होते.

विधानसभा निवडणुकीत बिहारमध्ये काँग्रेसला फारसं यश मिळालेलं दिसत नाही. काँग्रेसनं यंदा ७० जागा लढवल्या परंतु, केवळ १९ जागांवर विजय संपादन करण्यात पक्ष यशस्वी ठरला. २०१५ साली काँग्रेसनं २७ जागांवर विजय मिळवला होता.

दुसरीकडे, शुक्रवारी मुख्यमंत्री नितीशकुमार यांनी राज्यपालांची भेट घेऊन आपला राजीनामा सुपूर्द केला. मंत्रीमंडळाच्या बैठकीत विधानसभा भंग करण्याची शिफारस करण्यात आल्यानंतर नितीशकुमार यांनी आपला राजीनामा राज्यपालांकडे सोपवलाय. एनडीएच्या १५ नोव्हेंबर रोजी होणाऱ्या पुढच्या बैठकीत नवा नेता निवडण्यात येणार असल्याचं स्पष्ट करण्यात आलंय.

वाचा : वाचा :