० तुझ्या चित्रपटांमधून महिला सशक्तीकरणासाठी तू नेहमीच प्रेरणादायी ठरली आहेस…

– स्त्रीप्रधान चित्रपट करेन असं काही मी ठरवलं नव्हतं. हिंदी सिनेसृष्टीत मी नवखी होते, तेव्हा वेगवेगळ्या प्रकारच्या चित्रपटांमध्ये काम केलं. कोणत्या धाटणीचा चित्रपट माझ्यासाठी योग्य आहे हे तपासण्यासाठी मी तसं केलं होतं. त्यानंतर मी करत असलेल्या भूमिकांबद्दल बोलायला सुरुवात झाली. ‘पिंक’ या चित्रपटाला खूप चांगला प्रतिसाद मिळाला. तेव्हा माझ्या लक्षात आलं की, प्रेक्षक मला गर्ल नेक्स्ट डोअर म्हणजे सामान्य मुलीच्या भूमिकेत जास्त पसंत करतात. यानंतर माझ्याकडे एकापेक्षा एक अशा जबरदस्त भूमिका येऊ लागल्या. त्यांच्या नाविन्यामुळे मी त्याकडे आकर्षित होते.

० तू वेगवेगळ्या विषयांवर चित्रपट केले आहेत. तुला ज्यावर चित्रपट करावासा वाटेल असा कोणता मुद्दा किंवा विषय आहे?

– विषय तर अनेक आहेत. विशिष्ट मुद्दा किंवा विषय घेऊन, विचार करून मी चित्रपट करत नाही. मला माहीत नसलेले असे अनेक गंभीर विषय, समस्या आहेत. त्यावरील संहिता किंवा संशोधन माझ्यापर्यंत आलं की त्यावर बोललं पाहिजे, असं मला वाटू लागतं. पण अशा विषयांवर उत्तम कथा लिहिली गेली, तरच त्या चित्रपटात काम करणं योग्य ठरतं. नाही तर हल्ली असे चित्रपट पाहिले की प्रेक्षकांना फक्त त्यात मांडलेला मुद्दा दिसतो; त्याची कथा नाही. अशा चित्रपटातून फक्त ज्ञान दिलं जातंय असं त्यांना वाटू लागतं.

० तू अनेक तरुणींसाठी आदर्श आहेस. तुझी बहीण तुझ्यामुळे कशी प्रेरित होते ?

– अनेकांची प्रेरणा बनण्याइतकं दर्जात्मक काम मी केलंय याची जाणीव होऊन छान वाटतं. मी आणि माझी बहीण कधी या विषयावर बोललो नाही. त्यामुळे ती माझ्याकडून काय शिकते याची काही कल्पना नाही. मी तिला एवढं मात्र नक्की सांगितलं आहे की, जो मार्ग निवडशील त्यात स्वत:ला झोकून दे. स्वत:ची ओळख निर्माण कर. स्वत:ची भूमिका तुला मांडता आली पाहिजे. गर्दीत राहायचं नाही. स्वत: स्वत:चे निर्णय घे. ते चुकीचे ठरले, तरी त्याची जबाबदारी तूच घ्यायला हवी. त्यातून काहीतरी शिकायला हवं.

० तू मूळची दिल्लीची आहेस. मुंबईची कोणती गोष्ट तुला सर्वाधिक आवडते ?

– तुम्ही कुठूनही आला असलात, तरी मुंबईत तुम्ही स्वत:चं घर बनवू शकता. घराचा अर्थ, केवळ एखादी जागा खरेदी करणं इतकंच नसतं. तर नवीन शेजारी, मित्रपरिवार, काम आणि या सगळ्यामुळे तुम्ही सुरक्षित आहात ही भावना मनात निर्माण होते. काही दिवसांतच तुम्ही याच शहरातले आहात असं वाटू लागतं. आपलेपणानं एखाद्याला सामावून घेणं हे या शहराचं वैशिष्ट्य आहे.

० अभिनेत्री बनल्यानंतर एक स्त्री म्हणून तुझ्या जीवनात काय बदल झाला ?

– आयुष्य ही एक लढाई आहे याची जाणीव झाली; जी समानतेसाठी लढावी लागते. ही लढाई खूप मोठी आहे. तुम्हाला तुमची ताकद आणि क्षमतेचा पुरेपूर वापर करावा लागणार आहे. या लढाईत बराच काळ जाणार आहे. जर तुम्ही हार मानली, तर येणारी पिढी मागेच राहील. काम करत असताना समानतेची लढाई मी अगदी जवळून अनुभवली आहे. स्त्री असो वा पुरुष, समाज असो किंवा करिअर दोघांना समानतेच्या दिशेनं नेणं गरजेचं आहे. अभिनेत्री बनल्यानंतर मी एक स्त्री आणि अभिनेत्री अशा दोन्ही रुपात यासाठी सतत प्रयत्नशील असते.

० महिलांसमोरचं सगळ्यात मोठं आव्हान कोणतं आहे असं तुला वाटतं ?

– त्यांचे विचार हे सगळ्यात मोठं आव्हान आहे. एखादं काम, त्या केवळ महिला आहेत म्हणून करू शकत नाही किंवा करू नये असं त्यांना वाटणं हा विचार बदलायला हवा. त्यांचे असे विचारच त्यांच्या प्रगतीतील अडथळे आहेत. आपण स्वत:वर विश्वास ठेवत आपला मार्ग निवडण्याची हीच ती योग्य वेळ आहे. कोणतीच गोष्ट महिलांना काहीही करण्यापासून थांबवू शकत नाही. मी त्यांना सांगू इच्छिते की, स्वत:ला कमी लेखू नका.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here