राज्यात जळगाव, औरंगाबादमध्ये आर्थिक गुन्हे शाखेचे छापे; काय आहे प्रकरण?

म. टा. प्रतिनिधी, जळगाव: शहरातील भाईचंद हिराचंद रायसोनी मल्टी-स्टेट कॉ ऑपरेटीव्ह क्रेडीट सोसायटीतील अपहार तसेच फसवणूक प्रकरणी राज्यभरात चेअरमनसह अनेकांवर गुन्हे दाखल करण्यात आले आहेत. त्यानतंर या संस्थेवर पाच वर्षांपासून अवसायकाची नेमणूक करण्यात आली आहे. या काळात झालेल्या गैरव्यवहाराच्या तक्रारीवरुन आज शुक्रवारी पूणे येथील आर्थिक गुन्हे शाखेच्या पथकाने अवसयकासह, कर्जदार, ठेवीदार संघटनाचे पदाधिकारी व संस्थेच्या जागा लिलावात घेणाऱ्या उद्योजकांशी संबंधित ठिकाणांवर छापे मारले. सकाळपासूनच अवसायकाचे निवासस्थान, संस्थेच्या मुख्य कार्यालासह पाच ठिकाणी शंभरपेक्षा अधिक अधिकारी व कर्मचाऱ्यांकडून झाडाझडती घेतली जात आहे.

भाईचंद हिराचंद रायसोनी (बीएचआर) पतसंस्थेवर नियुक्त प्रशासक जितेंद्र कंडारे यांनी ८ नोव्हेंबर २०१५ रोजी जळगाव एमआयडीसीतील पतसंस्थेच्या मुख्य कार्यालयाचे कुलूप तोडून ताबा घेतला होता. त्यानंतर बीएचआर या अवसायानात असलेल्या सोसायटीविरोधात व अवसायक जितेंद्र कंडारे यांच्या कारभाराच्या विरोधात आंदोलन करण्यात आले होते. जितेंद्र कंडारे हे साशंक पद्धतीने काम करत असल्याच्या अनेक तक्रारी देखील सरकारकडे करण्यात आल्या होत्या.

या पार्श्वभूमीवर आज शुक्रवारी (ता.२७) सकाळी पुणे येथील आर्थिक गुन्हे शाखेच्या पथकाने जळगाव शहरात ठिकठिकाणी छापे मारले. यात बीएआरच्या एमआयडीसीतील मुख्य कार्यालयासह बीएचआरमधील फसवणूक तसेच अपहाराशी संबंधितांकडे आर्थिक गुन्हे शाखेच्या पथकांकडून चौकशी सुरू आहे. चौकशीसाठी पुणे येथील आर्थिक गुन्हे शाखेचे उपायुक्त भाग्यश्री नवटके यांच्या मार्गदर्शनासाठी १३६ जणांचे पथक शुक्रवारी सकाळी जळगावात धडकले. वेगवेगळ्या वाहनांमधून आलेल्या पथकांकडून शहरातील वेगवेगळ्या ठिकाणी स्वतंत्ररित्या चौकशी केली जात आहे. दोन पोलीस उपायुक्त, तीन सहायक उपायुक्त, नऊ पोलीस निरीक्षक, १० सहायक/उपनिरीक्षक अशा एकूण १३५ जणांचे पथक ही तपासणी करीत आहेत.

सकाळी सात वाजेपासून तपसाणी

बीएचआर संस्थेत झालेला अपहार, गुंतवणुकदारांची थकीत ठेवी न देणे, त्याशिवाय संस्थेच्या मालमत्तेची कवडीमोल दराने झालेली विक्री याची चौकशी करण्यासाठी आर्थिक गुन्हे शाखेचे पथक येथे पोहोचल्याचे समजते. सकाळी सात वाजता अवसायक जितेंद्र कंडारे यांच्या शिवाजी नगरातील घरी पथक धडकले. उपायुक्त भाग्यश्री नवटके यांनी तेथे झडती घेतली. तसेच संस्थेच्या एमआयडीसीतील मुख्य कार्यालयात देखील पथक पोहोचले. येथे ४५ जणांच्या पथकाने चौकशीची सूत्रे हाती घेतली. त्याशिवाय उद्योजक सुनील झंवर, पतसंस्था ठेवीदार संघटनेचे विवेक ठाकरे आदींच्या निवासस्थानी देखील झाडाझडती सुरू आहे.

औरंगाबादमध्येही कारवाई

भाईचंद हिराचंद रायसोनी पतसंस्थेच्या घोटाळ्याप्रकरणी पुणे पोलिसांच्या आर्थिक गुन्हे शाखेच्या पथकांनी छापे मारून चौकशी सुरू केली आहे. जळगाव आणि औरंगाबाद येथे ही कारवाई केली जात आहे. पुणे पोलीस, पिंपरी-चिंचवड पोलीस व पुणे ग्रामीण पोलीस यांच्या पथकांद्वारे ही कार्यवाही सुरू आहे. बीएचआर पतसंस्थेविरोधात या तिन्ही पोलीस ठाण्याच्या हद्दीत गुन्हे नोंदवण्यात आलेले आहेत.