म. टा. प्रतिनिधी, जळगावः येथील बीएचआर पतसंस्थेत सुमारे अकराशे कोटी रुपयांचा गैरव्यवहार झाला आहे. चौकशीसाठी अॅड. कीर्ती पाटील यांच्यासह आपण सन २०१५ पासून पाठपुरावा करत होतो. परंतु, तत्कालीन राज्य सरकारने मर्जीतील लोकांना सांभाळण्यासाठी चौकशीची टोलवा टोलवी केली. या राजकीय दबावामुळेच ‘बीएचआर’ घोटाळ्याच्या तपासाला विलंब झाला. केंद्र शासनाने चौकशीचे निर्देश देऊनही राज्य सरकारने दुर्लक्ष केल्याचा असा आरोप राष्ट्रवादी काँग्रेसचे नेते यांनी आज पत्रकार परिषदेत केला.

खडसे यांच्या जळगावातील मुक्ताई निवासस्थानी झालेल्या पत्रकार परिषदेत या गैरव्यवहाराचा पाठपुरावा करणाऱ्या अॅड. किर्ती पाटील उपस्थित होत्या. खडसे यांनी पुढे सांगीतले की, ‘बीएचआरच्या अनेक ठेवीदारांनी मी आमदार असताना माझ्याकडे पतसंस्थेच्या गैरव्यवहाराबद्दल तक्रारी केल्या होत्या. त्यामुळे मी राज्य सरकारकडे चौकशीची विनंती केली होती. त्यावेळी राज्य सरकारच्या वतीने मला बीएचआर ही मल्टिस्टेट को- ऑपरेटिव्ह पतसंस्था असल्याने मला केंद्राकडे तक्रार करायला सांगण्यात आले. त्यानुसार मी केंद्रीय मंत्री राधामोहन सिंह यांच्याकडे तक्रार केली होती. तक्रारीची दखल घेऊन सिंह यांनी पत्र पाठवून या प्रकरणाची चौकशी ‘ईओडब्ल्यू’मार्फत करण्याचे निर्देश राज्य सरकारला दिले होते. राधामोहन सिंह यांच्या पत्राच्या आधारे राज्य सरकारकडून चौकशी होणे अपेक्षित होते. पण या गैरव्यवहारात तत्कालीन राज्य सरकारच्या मंत्र्यांशी हितसंबंध असलेले लोक गुंतलेले होते. म्हणून राज्य सरकारने ही चौकशी केली नाही,’ असा आरोप एकनाथ खडसे यांनी यावेळी केला.

या प्रकरणाचा पाठपुरावा करणाऱ्या अॅड. किर्ती पाटील यांना बीएचआर पतसंस्था तसेच राज्य सरकारकडून आवश्यक असणारी कागदपत्रे उपलब्ध करून देण्यात आली नाही. हा विषय तत्कालीन विरोधी पक्षनेते धनंजय मुंडे यांच्याकडेही मांडण्यात आला होता. नंतर स्वतः धनंजय मुंडे यांनी माहितीच्या अधिकारात माहिती मागितली. त्यांना किरकोळ स्वरुपाची माहिती देण्यात आली.

या घोटाळ्यात मोठे मासे पण, नामोल्लेख टाळला

गैरव्यवहार करणाऱ्या अनेकांनी कोट्यवधी रुपयांच्या मालमत्ता कवडीमोल भावात खरेदी केल्या आहेत. त्यामुळे ठेवीदारांना खूप फटका बसला आहे. जळगाव जिल्ह्यातील जामनेरसह पुण्यातील निगडी येथील काही जमिनी अशा प्रकारे घेण्यात आलेल्या आहेत. यात मोठ्या प्रमाणावर गैरव्यवहार झाला आहे. आता या गैरव्यवहाराची आर्थिक गुन्हे शाखेकडून चौकशी सुरू असल्याने मी अजून काही माहिती जाहीर करू शकत नाही. मला मर्यादा आहेत, असे सांगत खडसेंनी गैरव्यवहारात सहभागी असणाऱ्या लोकांची थेट नावे घेणे टाळले.

ठेवीदारांना न्याय देण्यासाठीच पाठपुरावा

राज्य सरकारने या प्रकरणाच्या चौकशीसाठी सहकार्य करण्याची गरज आहे. राज्य सरकारने ठेवीदारांना त्यांचे पैसे परत मिळावेत, म्हणून मदत करण्याची माझी मागणी आहे, असेही खडसे म्हणाले. ठेवीदारांना न्याय मिळण्यासाठीच पाठपुरावा करीत असल्याचे खडसे यांनी सांगीतले. राज्य सरकारने या प्रकरणाच्या चौकशीत लक्ष घालण्याची गरज आहे, असे एकनाथ खडसे यांनी सांगितले.

तत्कालीन सहकार मंत्र्यांकडून राजकीय दबावाची कबुली

या गैरव्यवहारच्या चौकशीसाठी राज्याचे तत्कालीन सहकार मंत्री सुभाष देशमुख यांच्याकडे पाठपुरावा करत होतो. तेव्हा एकदा सुभाष देशमुख आणि माझ्यात शाब्दिक चकमक देखील उडाली होती. यावेळी सावरासावर करताना देशमुख यांनी माझ्यावर राजकीय दबाव असल्याची कबुली दिली होती, असा गौप्यस्फोट देखील खडसेंनी यावेळी केला. त्यानंतर सातत्याने होणारा पाठपुरावा लक्षात घेऊन या प्रकरणाची चौकशी होत आहे, असे भासवण्यासाठी ‘ईओडब्ल्यू’ ऐवजी स्थानिक गुन्हे शाखेच्या वतीने चौकशी करण्यात आली. त्याबाबतही तक्रारी झाल्या. तेव्हा दिल्लीतून चौकशी बदलाच्या सूचना करण्यात आल्या. पण राज्य सरकारने त्याची दखल घेतली नसल्याचा आरोपही खडसेंनी केला.

अव्यवसायकाकडून गैरव्यवहार: अॅड. किर्ती पाटील

बीएचआर पतसंस्थेत मोठ्या प्रमाणावर गैरव्यवहार झाला आहे. त्यात अनेक बड्या हस्ती सहभागी आहेत. मी याबाबत केंद्र सरकारच्या मंत्र्यांपर्यंत पाठपुरावा केला आहे. बीएचआर पतसंस्थेत प्रचंड गैरव्यवहार झाला आहे. मात्र, त्याची तक्रारीनंतरही सखोलपणे चौकशी झालेली नाही. अवसायकाने खूप चुकीच्या पद्धतीने काम केले असून, मोठा गैरव्यवहार केला आहे. या पतसंस्थेचे २०१५ पासून ते आजतागायत लेखापरीक्षण झालेले नाही. ते का पूर्ण झाले नाही? हे अनुत्तरीतच आहे, अशी माहिती या प्रकरणाचा पाठपुरावा करणाऱ्या अॅड. किर्ती पाटील यांनी दिली. अवसायकाने मुदतपूर्व सेवानिवृत्तीचा प्लान आखला होता. विशेष म्हणजे यापूर्वी अवसायकाला बदलविण्यासाठी केंद्र शासनाकडे मागणी केली होती. मात्र, तेव्हा देखील येथिल राजकीय पुढाऱ्यांनी दिल्लीत जावून त्यास आडकाठी केल्याचेही खडसे यांनी शेवटी सांगीतले.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here