चार महिन्यापूर्वी कोल्हापुरात पोलिसांनी टाकलेल्या धाडीत महिलांना जुगार खेळताना पकडण्यात आले होते. त्यानंतर शनिवारी इचलकरंजी व जयसिंगपूर परिसरात स्थानिक गुन्हे अन्वेषण विभागाने महिलांच्या जुगार अड्ड्यावर छापा टाकला. यावेळी जुगार खेळणाऱ्या सात महिला आणि एका पुरूषाला अटक करण्यात आली. याबाबत अधिक माहिती अशी, जयसिंगपूर पोलीस ठाण्याच्या हद्दीतील संभाजीनगर येथे एका घरात तीन पाणी पत्त्याचा जुगार चालू असल्याबाबत माहिती पोलिसांना मिळाली. त्यानुसार त्या ठिकाणी स्थानिक गुन्हे शाखा इचलकरंजी पथकाद्वारे माहिती घेण्यात आली.
माहितीची खातरजमा झाल्यानंतर जयसिंगपूर पोलिसांच्या मदतीने सदर ठिकाणी छापा टाकला असता एकूण सात महिला व एक पुरुष अशांना तीन पानी पत्याचा जुगार पैशावर खेळताना आढळून आले. त्यांना जागीच ताब्यात घेऊन पुढील तपास व कारवाई कामी जयसिंगपूर पोलीस ठाणे यांच्या ताब्यात देण्यात आले आहे. त्यांच्याकडून ३८ हजाराचा मुद्देमाल हस्तगत करण्यात आला.
अटक केलेल्या महिलामध्ये मीना काळे, छाया लोंढे, हेमा कसबेकर, वर्षा लोंढे, बेबी शेख, ज्योती पाटील यांचा समावेश आहे. या महिलांची अधिक चौकशी केली असता सदर महिला या सराईत चोरट्या असून त्या रेकॉर्डवरील गुन्हेगार आहेत. यावेळी अर्जुन वसगडेकर यालाही यालाही अटक करण्यात आली आहे.
याचा अधिक तपास जयसिंगपूर पोलीस ठाणे करत आहेत. ही कारवाई पोलीस अधीक्षक कोल्हापूर शैलेश बलकवडे, अपर पोलीस अधीक्षक गड विभाग जयश्री गायकवाड, उप विभागीय पोलीस अधिकारी जयसिंगपूर विभाग-रामेश्वर वैंजणे, पो.नि. तानाजी सावंत यांचे मार्गदर्शनाखाली इचलकरंजी पथकाद्वारे करण्यात आली.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
