दोन वर्षांपूर्वी झालेल्या या फसवणूकप्रकरणी डॉ. पल्लवी सापळे दोषी आढळूनही त्यांच्यावर कारवाई करण्यास आरोग्य विभागाकडून टाळाटाळ होत असल्याचा आरोप संघर्ष सफाई कामगार संघटनेचे अध्यक्ष डॉ. महेश कुमार कांबळे आणि माहिती अधिकार कार्यकर्ते प्रितेन आसर यांनी केला आहे.
माजी अधिष्ठाता डॉ. सापळे यांनी केलेल्या फसवणुकीची माहिती देताना डॉ. कांबळे म्हणाले, दोन वर्षांपूर्वी मिरज शासकीय वैद्यकीय महाविद्यालयाला देणगीतून एक रुग्णवाहिका मिळाली. तत्कालीन अधिष्ठाता डॉ. पल्लवी सापळे यांनी त्यांच्या आई डॉ. सुप्रिया सापळे यांच्या देणगीतून रुग्णवाहिका मिळाल्याचे जाहीर केले. रुग्णवाहिका प्रदान करण्याचा कार्यक्रमही झाला. मात्र, रुग्णवाहिका खरेदीसाठी रुग्णालयाच्या बँक खात्यातून १३ लाख रुपये वजा झाल्याचे माहिती अधिकारातून समोर आले आहे.
रुग्णालयाच्या पैशातून रुग्णवाहिका खरेदी करून डॉ. सापळे यांनी त्यांच्या आईच्या देणगीतून मिळाल्याचे का सांगितले? त्यांच्या आईने देणगी दिली असेल तर ते पैसे कुठे गेले? याबाबत झालेल्या तक्रारींनंतर डॉ. सापळे यांची चौकशी झाली. चौकशीत त्यांना दोषी ठरवण्यात आले आहे. मात्र, राज्यात सत्तापालट होताच त्यांच्यावरील कारवाईला टाळाटाळ सुरू झाली.
वैद्यकीय शिक्षण मंत्री अमित देशमुख यांनी तातडीने याप्रकरणी लक्ष घालावे, अशी मागणी संघर्ष सफाई कामगार संघटनेने केली आहे. १५ डिसेंबरपर्यंत माजी अधिष्ठाता डॉ. पल्लवी सापळे यांच्यावर फसवणुकीचा गुन्हा दाखल करून त्यांना निलंबित करावे, अन्यथा मंत्रालयासमोर बेमुदत उपोषण करू, असा इशारा संघर्ष सफाई कामगार संघटनेचे अध्यक्ष डॉ. महेश कांबळे आणि माहिती अधिकार कार्यकर्ते प्रितेन आसर यांनी दिला आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
