म. टा. प्रतिनिधी, नगर: राष्ट्रवादी काँग्रेसच्या कार्यकर्त्या रेखा भाऊसाहेब जरे यांच्या खून प्रकरणाने आता गंभीर वळण घेतले आहे. त्यांचा मोठा मुलगा रुणाल भाऊसाहेब जरे याने पोलीस अधीक्षकांना एक निवेदन दिले असून, त्यामध्ये पत्रकार हाच या प्रकरणाचा सूत्रधार असल्याचे सांगितले. त्याच्यापासून आपल्या कुटुंबीयांच्या जीवाला धोका असल्याने पोलीस संरक्षण द्यावे, अशी मागणीही त्याने केली.

आतापर्यंत बोठे यांचा संबंध यातील आरोपींकडून मिळालेली माहिती आणि त्या आधारे पोलिसांनी संकलित केलेले पुरावे यावर आधारित होता. आता प्रथमच जरे कुटुंबायांकडून यावर भाष्य करण्यात आले असून, आरोपींची माहिती आणि पोलीस तपासाला दुजोरा दिलेला आहे.

जरे यांचा मोठा मुलगा रुणाल याने पोलीस अधीक्षक मनोज पाटील यांना निवेदन दिले आहे. ‘पत्रकार बाळासाहेब जगन्नाथ बोठे याचे आमच्या घरी येणे-जाणे असायचे. माझ्या आईचा त्याने अनेकदा मानसिक व शारीरिक छळ केला आहे. तिला तो जीवे मारण्याची धमकी देत असे. तुला किंवा तुझ्या मुलांना ठार करीन, अशी धमकी देत असे. त्याची आमच्या कुटुंबावर मोठी दहशत होती. त्यामुळे आम्ही कोणी त्याच्या विरोधात बोलत नव्हतो. यापूर्वी माझ्या आईने त्याच्याविरोधात पोलिसांत अर्ज दिले आहेत. आईच्या खून प्रकरणातील आरोपींनी खुनाची कबुली दिली आहे. त्यांचा सूत्रधार बोठे असल्याचे समोर आले आहे,’ असेही निवेदनात त्याने म्हटले आहे.

पोलिस संरक्षणाची मागणी करताना जरे म्हणाला की, ‘ही घटना घडली तेव्हा माझी आजी सिंधुताई आणि धाकटा भाऊ कुणाल सोबत होते. ते या घटनेचे ते प्रत्यक्षदर्शी साक्षीदार आहेत. बोठे हा गुंड प्रवृत्तीचा असल्याने व त्याने आधीच आमचे कुटुंब संपवून टाकण्याची भाषा केलेली असल्याने त्याच्यापासून अथवा हस्तकांपासून आमच्या जीवाला धोका आहे. आमच्या जीवाचे काही बरे वाईट झाल्यास त्याला बोठे हाच जबाबदार राहील. आम्हाला पोलीस संरक्षण देण्यात यावे.’

पत्रकार बोठेचा अटकपूर्व जामिनासाठी अर्ज

रेखा जरे खून प्रकरणातील मुख्य सूत्रधार बाळ बोठे याने जिल्हा न्यायालयात अटकपूर्व जामीनासाठी अर्ज दाखल केला आहे. त्यावर उद्या सुनावणी होण्याची शक्यता व्यक्त केली जात आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here