करोनामुळं लॉकडाऊन लागू झाला. लॉकडाऊनमुळं अनेक क्षेत्रातील लोकांना याचा फटका बसला असून अनेकांचे व्यवसायही ठप्प झाले आहेत. लॉकडाऊन संपून अनलॉकची प्रक्रिया सुरु झाली आहे. व्यवसायांवरील अनेक निर्बंध सरकारने हटवले आहेत तरीसुद्धा व्यवसाय पुन्हा सुरु करण्यास अडचणी येत आहेत. या पार्श्वभूमीवरच आज वाहतूक व्यावसायिक संघटनांनी राज ठाकरेंची भेट घेतली असून त्यांच्यासमोर अडचणींचा पाढा वाचून दाखवला आहे.
कोरोना महासाथीत अनेक वित्तीय संस्थांनी (बॅंका, एनबीएफसी, पतपेढ्या) वाहतूक व्यावसायिकांचं आर्थिक शोषण केलं. या पार्श्वभूमीवर महाराष्ट्रातील सर्व प्रमुख वाहतूक व्यावसायिक संघटनांच्या वरिष्ठ पदाधिकाऱ्यांनी मनसे अध्यक्ष राजसाहेब ठाकरे यांची कृष्णकुंज निवासस्थानी भेट घेतली. दरम्यान, सर्व बँक आणि फायनान्स कंपन्यांना पत्र लिहित मुदत वाढीची मागणी करेन, असं आश्वासन राज ठाकरे यांनी वाहतूक शिष्टमंडळाला दिलं आहे.
लॉकडाऊनच्या काळात जिम चालक-मालक, थिअटर चालक-मालक, सलून व्यावसायिक, हॉटेल मालक-चालक, मुंबईतील डबेवाले अशा विविध क्षेत्रातील लोकांनी राज ठाकरे यांची भेट घेतली होती. करोनानंतरच्या लॉकडाऊनमुळं येणाऱ्या अडचणी त्यांनी राज यांच्यापुढं मांडल्या होत्या. तसंच, याबाबत आवाज उठवण्याची मागणी केली होती. त्यांच्या मागण्यांसाठी पाठपुरावा करण्याचं व प्रसंगी आंदोलन करण्याचं आश्वासन राज यांनी दिलं होतं.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
