म. टा. प्रतिनिधी, पुणेः सहा तासाहून अधिक काळ सुरू असलेल्या थरारनाट्यानंतर अखेर महात्मा सोसायटी परिसरात घुसलेल्या गव्याला पकडण्यात यश आले. त्यानंतर या गव्याला भूगाव येथील रेस्क्यू सेंटरला नेण्यात आले. मात्र, काही वेळात त्याचा मृत्यू झाला. त्याच्या मृत्यूचे कारण अद्याप स्पष्ट झालेले नाही.

चित्रपटाला शोभेल अशा या थरारनाट्यामुळे कोथरूडमध्ये घबराट पसरली होती. सकाळी सातच्या सुमारास महात्मा सोसायटीच्या गल्ली क्रमांक एकमध्ये गवा शिरल्याची माहिती स्थानिक रहिवाशांनी पोलिस व वनविभागाला दिली. त्यानंतर अग्निशामक दल, पोलिस, महापालिकेची यंत्रणा तसेच खासगी प्राणीमित्र संघटनांच्या कार्यकर्त्यांनी महात्मा सोसायटीत धाव घेतली. महात्मा सोसायटीतील दोन बंगल्यांदरम्यान असलेल्या मोकळ्या प्लॉटमध्ये गव्याने ठाण मांडले होते. या बंगल्याच्या आजूबाजूने तसेच या गल्लीत जाळ्या लावून व अडथळे उभे करून गव्याला पकडण्याचा प्रयत्न करण्यात आला. दरम्यान झाडाला धडक दिल्याने गवा जखमी झाला. दरम्यानच्या काळात महात्मा सोसायटीतील काही वाहने व बंगल्यांच्या प्रवेशद्वारांचेही या गव्याने नुकसान केले.

या गव्याला दोन वेळा बेशुद्धीचे इंजेक्शन देण्याचा प्रयत्न केला गेला. पण सव्वाअकराच्या सुमारास या प्लॉटच्या कंपाउंडवरून उडी मारत या गव्याने धूम ठोकली. महात्मा सोसायटी, वृंदावन सोसायटी, सहवास, सद्भाव सोसायटीलगतच्या रस्त्यावरून गाड्यांना धडका देत हा गवा महात्मा सोसायटीच्या मागील बाजूस जिजाई गार्डनमध्ये घुसला. तिथूनही या गव्याने पूजा पार्क मार्गे पौड रस्त्यावर धाव घेतली. गव्यामागे अग्निशामक दलाची वाहने, पोलिस, वनखाते व प्राणीप्रेमी धावत असल्याने रस्त्यावर मोठा थरार अनुभवायला मिळाला.

अत्यंत वर्दळीचा पौड रस्ता ओलांडून गव्याने राहुल टॉवरपर्यंत धाव घेतली. तिथे बघ्यांची मोठी गर्दी जमली होती. तिथे बेशुद्धीचे इंजेक्शन देण्याचा प्रयत्न करत असताना गवा पुन्हा पळाला आणि इंदिरा शंकर नगरी २ मधील मोकळ्या मैदानात बसला. तिथून एका बंगल्याच्या कंपाउंडवरून उडी मारत पुन्हा पौड रस्ता ओलांडत हा गवा इंदिरा शंकर नगरी एक मध्ये आला. शेवटी ऋतुगंध या बंगल्याचे कंपाउंड ओलांडता न आल्याने गवा तिथेच अडकला. त्यानंतर अंगावर जाळी टाकून दोर अडकवून त्याला जेरबंद करण्यात आले. तसेच बेशुद्धीचे इंजेक्शनही देण्यात आले. त्यानंतर सुमारे तीसहून अधिक कर्मचारी, स्वयंसेवकांनी या गव्याला उचलून महापालिकेच्या ट्रकमध्ये टाकले. आणि नागरिकांनी सुटकेचा निश्वास सोडला. वनविभागाचे अनिल खैरे, राहुल पाटील, अग्निशामक दलाचे गजानन पाथ्रुडकर, स्थानिक नगरसेवक उपस्थित होते.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here