कांदिवली पूर्वेकडील कचरा डेपो येथे २९ नोव्हेंबर रोजी राहुल म्हस्के या सफाई कामगाराला कचरा कुंडीमध्ये एक मृत अर्भक सापडले. याबाबत कळताच समतानगर पोलिस घटनास्थळी पोहोचले आणि अर्भक ताब्यात घेत याप्रकरणात गुन्हा दाखल करण्यात आला. मृत अर्भक हे मुलगा असल्याने ते फेकण्यामागे मुलगा-मुलगी असा भेद नसावा असा अंदाज पोलिसांना होता. समतानगर पोलिसांबरोबरच गुन्हे शाखा युनिट १२ चे पथक याप्रकरणाचा तपास करीत होते. ज्या ठिकाणी अर्भक सापडले तेथील तसेच आजूबाजूच्या परिसरातील सीसीटीव्ही फुटेजची झाडाझडती घेण्यात आली. रुग्णालये, गर्भवती महिला यांची माहिती काढण्यात आली. तपास कौशल्य आणि तांत्रिक माहितीच्या आधारे पोलिसांनी अर्भक फेकणाऱ्या महिलेला ताब्यात घेतले. सुरुवातीला टाळाटाळ करणाऱ्या या महिलेने अर्भक फेकल्याचे मान्य केले. हे अर्भक बहिणीचे असून लग्नाआधीच ती गर्भवती राहिल्याने औषध घेऊन घरातच गर्भपात केल्याचे तिने सांगितले. गुन्हे शाखेच्या पथकाने या महिलेला समतानगर पोलिसांच्या ताब्यात दिले असून पोलिस याप्रकरणाचा अधिक तपास करीत आहेत.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
