‌म. टा. प्रतिनिधी, मुंबई

मुंबई महापालिकेच्या आगामी निवडणुकीसाठी शिवसेना आणि भाजपने कंबर कसली असून, स्वबळावर लढण्याची भाषा करणाऱ्या मुंबई काँग्रेसमध्ये कमालीची मरगळ आहे. मुंबईत विभागीय काँग्रेसच्या अखत्यारीत मुंबईतील सहा जिल्ह्यांचे अध्यक्ष हे १५ ते २० वर्षांपासून बदलले गेले नसून, स्थानिक पातळीवरील ब्लॉक काँग्रेस म्हणजेच २२७ वॉर्डातील काँग्रेसचे निष्क्रिय म्होरके १५ ते २० वर्षांपासून पदे अडवून बसले आहेत.

देशात काँग्रेसला चांगले दिवस असताना, औद्योगिक राजधानी मुंबईतही काँग्रेसचा बोलबाला होता. काँग्रेस पक्षातंर्गत गटबाजी आणि शह काटशहाच्या राजकारणातून मुंबईत शिवसेनेला मोकळे रान मिळाले आणि शिवसेनेने महापालिकेवरील सत्ता कायम राखण्यात यश मिळाले. मुंबई विभागीय काँग्रेसचे तत्कालीन अध्यक्ष भानुशंकर याज्ञिक यांच्यानंतर मुंबई काँग्रेसच्या अध्यक्षपदाची धुरा माजी मंत्री मुरली देवरा यांनी दोन दशकांहून अधिक काळ समर्थपणे सांभाळली होती. त्यानंतरच्या मुंबई अध्यक्षांना फारसा प्रभाव पाडता आला नाही.

मुंबई महानगरी म्हणजे मिनी इंडियाचे दुसरे रूप असून, कॉस्मोपोलिटन शहरांमध्ये काँग्रेसला आपला जनाधार गेल्या अडीच दशकात टिकवता आला नाही. केवळ निवडणुका आल्या की, या पक्षाचे अस्तित्व जाणवते. त्यानंतर काँग्रेसचा पक्ष या नात्याने सामान्य लोकांशी जनसंपर्क अथवा लोकहिताचे कार्यक्रम कुठेच दिसत नाही. काँग्रेसच्या प्रदेशाध्यक्षांनीसुद्धा मुंबई विभागीय काँग्रेसची ताकद वाढावा अथवा पक्षसंघटना बळकट व्हावी यासाठी कधीच प्रयत्न केल्याचे अलीकडच्या काळात दिसत नसल्याचे मुंबईतील काँग्रेसच्या जुन्या पदाधिकाऱ्यांचे म्हणणे आहे.

उत्तर भारतीय, दक्षिण भारतीय, दलित, अल्पसंख्याक आणि बहुजन वर्गातील काँग्रेसचा जनाधार दिवसेंदिवस कमी होत चालला आहे. मुंबईकडे काँग्रेसच्या हायकमांडचे दुर्लक्ष झाले असून, राज्याचे प्रभारी मुंबईतील पंचतारांकित हॉटेलमध्ये मुक्काम ठोकतात. सामान्य मुंबईकर काँग्रेसजनांना प्रभारी भेटत नाहीत, अशा तक्रारी आहे. याआधीचे प्रभारी मल्लिकार्जुन खरगे यांचा कित्ता सध्याचे प्रभारी एच. के. पाटील गिरवत असल्याचे काँग्रेस कार्यकर्ते खासगीत बोलत असतात. करोनाच्या काळात आरोग्यविषयक नियम पाळून मुंबईत काँग्रेसने कुठलाही कार्यक्रम घेतल्याचे दिसत नाही, असे काँग्रेसजन बोलतात. मुंबई अध्यक्ष बदलणार अशी हाकाटी कायम दिली जाते. मुंबईच्या अध्यक्षपदासाठी अमरजित मनहास, चरणसिंग सप्रा, माजी आमदार मधु चव्हाण, उपेंद्र दोशी, आमदार भाई जगताप, मधुकांत शुक्ला आदींचे नावे शर्यतीत आहेत. तर विद्यमान अध्यक्ष एकनाथराव गायकवाड यांना आपलीच फेरनियुक्ती व्हावी, असे वाटते. याचाच अर्थ मरगळ आलेली काँग्रेस आणि कागदावरील पदाधिकारी यांच्यामुळे मुंबईतील काँग्रेसच्या भवितव्यावर प्रश्नचिन्ह कायम असल्याचे मुंबईतील सामान्य काँग्रेसजनांमध्ये चर्चा आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here