हा वाद झाला तो यष्टीरक्षक आणि त्याच्या बाजूला उभ्या असलेल्या स्लीपच्या खेळाडूमध्ये. एका सामन्यात यष्टीरक्षकाचा तोल गेलेला पाहायला मिळाला आणि चक्क तो आपल्याच संघातील खेळाडूच्या अंगावर धावून गेला.
ही गोष्ट घडली ती बंगबंधू ट्वेन्टी-२० चषकातील एका सामन्यात. या सामन्यात मुशफिकर रहिम हा यष्टीरक्षण करत होता. हा सामना बेक्सिम्को ढाका आणि फॉर्च्युन बारिशाल या संघांमध्ये सुरु होता. ही गोष्ट सामन्याच्या १७व्या षटकात घडली. त्यावेळी बारिशाल संघातील असिफ होसेन फलंदाजी करत होता. होसेनच्या बॅटचा यावेळी एज लागला आणि चेंडू उडाला. त्यावेळी झेल पकडण्यासाठी रहिम सरसावला. पण त्याच्या मार्गात त्याच्याच संघातील नासुम अहमद आला. हा झेल यावेळी सुटेल असे वाटत होते. पण रहिमने हा झेल पकडला, पण त्यानंतर रहिमचा तोल गेल्याचे पाहायला मिळाले. त्यानंतर रहिम हा अहमदच्या अंगावर धावून गेला आणि त्याच्या कानशिलात लगावणार, असे वाटत होते. पण रहिमने आपला हात यावेळी आखडता घेतला आणि मोठा अनर्थ ठरला.
या घटनेचा व्हिडीओ आता क्रिकेट विश्वात चांगलाच व्हायरल झालेला आहे. बऱ्याच जणांनी यावेळी रहिमला चांगलेच ट्रोल केल्याचे पाहायला मिळत आहे. क्रिकेट हा सभ्य गृहस्थांचा खेळ आहे, त्याचबरोबर प्रत्येकामध्ये खेळभावना असायला हवी. पण रहिमने यावेळी जे काही केले ते चुकीचेच होते. रहिमने यावेळी अहमदच्या कानशिलात लगावली नाही, कारण ही गोष्ट अधिक गंभीर झाली असती आणि त्याचे पडसाद क्रिकेट विश्वात उमटले असते. पण या घटनेनंतर खेळाडूंनी मैदानात कसे राहायला हवे, ही गोष्ट जाणून घेणे गरजेचे आहे. कारण संघभावना ही प्रत्येक खेळाडूसाठी महत्वाची असते.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
