म. टा. प्रतिनिधी, कोल्हापूर: पन्हाळा तालुक्यातील कोडोली येथे करणाऱ्या डॉक्टरास रंगेहाथ पकडण्यात आले. दिवसभर राबवलेल्या स्टिंग ऑपरेशनमध्ये हा डॉक्टर रंगहाथ सापडला आहे. दरम्यान, तीन वर्षापूर्वी देखील याच अरविंद कांबळे या डॉक्टरास गर्भलिंग निदान करताना पकडण्यात आले होते. दुसऱ्यांदा तो सापडल्याने त्याच्या विरोधात संताप व्यक्त केला जात आहे.

कोडोली या गावात कांबळे या ५५ वर्षीय डॉक्टराचे मातृसेवा नावाचे हॉस्पिटल आहे. या हॉस्पिटलमध्ये गर्भलिंग निदान केले जात असल्याचा संशय काही सामाजिक कार्यकर्त्यांना होता. त्यामुळे त्यांनी काही दिवस त्याच्यावर पाळत ठेवली होती. या कार्यकर्त्यांनी प्रशासकीय वैद्यकीय अधिकाऱ्यांशी संपर्क साधला. अधिकारी व गीता हसूरकर व इतर कार्यकर्ते या दोघांनी मिळून बुधवारी स्टिंग ऑपरेशन राबवले. त्यामध्ये डॉक्टर कांबळे यास गर्भलिंग निदान करताना रंगेहाथ पकडण्यात आले. तो यासाठी वीस हजार रूपये घेत होता. या कारवाईत तो एवढी मोठी रक्कम घेतल्याचेही आढळून आले.

तीन वर्षापूर्वी म्हणजे २०१७ मध्ये या डॉक्टरास गर्भलिंग निदान करताना पकडण्यात आले होते. त्याच्यावर कारवाई करून त्याच्या रुग्णालयातील सोनोग्राफी मशीन सील करण्यात आले होते. पण प्रकरण शांत होताच डॉक्टराने आपला मूळ धंदा सुरू केला. सोनोग्राफी मशीनचं सील काढून त्याने पुन्हा गर्भलिंग निदान सुरू केले. पण बुधवारी त्याच्यावर कारवाई करण्यात आली. या कारवाईत पन्हाळा पोलिसांनी भाग घेतला. या प्रकरणी पन्हाळा पोलिस पुढील तपास करत आहेत. त्याचे रॅकेट कुठेपर्यंत आहे, त्याच्या या कारनाम्यात आणखी कुणी सहभागी आहे का याची पोलिसांनी चौकशी सुरू केली आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here