वाचा:
जळगाव येथील मराठा विद्या प्रसारक सहकारी समाज संस्थेचा ताबा मिळवण्यासाठी भोईटे गटाने अॅड. विजय पाटील यांना पुण्यात बोलावून चाकूचा धाक दाखवत मारहाण केली. तसेच याचवेळी व्हिडिओ कॉलवरुन माजी मंत्री गिरीश महाजन यांनी एक कोटी रुपयांची ऑफर दिली. जानेवारी २०१८ मध्ये घडलेल्या या घटनेप्रकरणी ८ डिसेंबर रोजी निंभोरा पोलीस ठाण्यात गिरीश महाजन, रामेश्वर नाईक यांच्यासह भोईटे गटातील सदस्यांवर गुन्हा दाखल करून तो गुन्हा पुणे येथील कोथरूड पोलीस ठाण्यात वर्ग करण्यात आला आहे. यासंदर्भात आपली बाजू मांडण्यासाठी गिरीश महाजन यांनी जळगावात पत्रकार परिषद घेतली व हा गुन्हा म्हणजे राज्यातील सत्तेचा वापर करून सूडाच्या राजकारणातून तयार करण्यात आलेले षडयंत्र असल्याचा आरोप त्यांनी केला.
हायकोर्टाने दिली स्थगिती
महाजन यांनी सांगितले की, हा गुन्हा बनावट आहे, हे प्रथमदर्शनी सिद्ध होते. ही घटना जर पुण्यात घडली, तर गुन्हा तिकडे दाखल व्हायला हवा होता. फिर्यादी जळगाव शहरातील रहिवासी आहे, तर जळगावात गुन्हा दाखल होणे अपेक्षित होते. पण गुन्हा रावेर तालुक्यातील निंभोरा सारख्या ग्रामीण भागात का दाखल झाला? हा प्रश्नच आहे. हा गुन्हा राजकीय उद्देशाने दाखल झाला आहे. म्हणून मी मुंबई उच्च न्यायालयात दाद मागितली आहे. न्यायालयाने दि. ७ जानेवारीपर्यंत या गुन्ह्यात कोणतीही कार्यवाही करू नये, दोषारोपपत्र दाखल करू नये, असे आदेश दिले आहेत. हा प्रकार अतिशय गंभीर आहे. या प्रकरणाची सखोल चौकशी झाली पाहिजे. सर्वांचे मोबाइल कॉल डिटेल्स तपासावे, मोबाइल लोकेशन तपासावे, अशी माझी मागणी आहे, असेही गिरीश महाजन यांनी सांगितले.
वाचा:
पोलिसांवर गृह खात्याचा दबाव
या प्रकरणात गुन्हा दाखल करण्यासाठी पोलिसांवर मुंबईतून दबाव आणला गेला. राजकीय हेतुने खोटा गुन्हा दाखल करण्यात आल्याने मी उच्च न्यायालयात दाद मागितली आहे, त्यात मी देखील पुरावे सादर करणार आहे. या गुन्ह्याची माहिती झाल्यानंतर मी पोलिसांना विचारणा केली. तेव्हा पोलिसांनी आमच्यावर मुंबईतून, गृह खात्याकडून दडपण असल्याचे सांगितले आहे. सत्ताधारी पक्षाकडून असा प्रकार होत असेल तर हे अतिशय गंभीर आहे. सरकारकडून सूडाचे राजकारण केले जात आहे. मी देखील ३० वर्षे राजकारणात आहे, पण मी कधीही असे राजकारण केले नाही. आम्हाला एफआयआरची साधी प्रत मिळाली नाही. यावरून पोलिसांवर किती दबाव आहे, याचा प्रत्यय येत आहे, असेही महाजन यांनी सांगितले.
…तर जशाच तसेच उत्तर
सत्ता आहे म्हणून सूडाच्या राजकारणाचे असे प्रकार सुरू आहेत. दररोज कोणत्याही एखाद्या प्रकरणात काहीतरी पत्र द्यायचे, चौकशी लावायची, असाच प्रकार सुरू आहे. पक्ष आमच्या सोबत आहे. आतापर्यंत आम्ही गप्प बसलो. आता आम्हीही मुद्दे मांडू. आम्ही असे खोटेनाटे गुन्हे नाही तर पुराव्यासह मुद्दे मांडू. विरोधक अशा पद्धतीने वागत असतील तर आम्हीही जशास तशे उत्तर देऊ. पण आम्ही खोटं मांडणार नाही, तर जे खरे आहे तेच आम्ही करू. ईडीचे राजकारण भाजप करत नाही. कुठे आहे ईडीचे राजकारण, ते दाखवून द्यावे. ईडीच्या बाबतीत भाजपवर होणारे आरोप खोटे आहेत, असेही ते म्हणाले.
वाचा:
बीएचआरचेही सत्य बाहेर येईल
बीएचआर हे प्रकरण नेमकं काय आहे, हे तपासात समोर येईलच. या प्रकरणात कशा पद्धतीने गैरव्यवहार झाला आहे, ते समोर येईल. त्यानंतर सर्वांना सत्यता कळणार आहे. या प्रकरणातील संशयित आरोपी हे माझेच नाही तर सर्वांचे जवळचे आहेत. आरोप करणाऱ्याचे त्यांच्याशी संबध नाहीत काय? पण वेळ आली की बदलायचे हे चुकीचे. माझ्याशी संबंध जोडणे योग्य नाही, असेही त्यांनी सांगितले.
भाजपचा एकही आमदार जाणार नाही
महाविकास आघाडी भाजपचे आमदार फोडणार असल्याची चर्चा सुरू आहे. याबाबत स्पष्टीकरण देताना गिरीश महाजन म्हणाले की, भाजपचे आमदार फोडणार, या नुसत्या अफवा आहेत. आपले अस्तित्व दाखवण्यासाठी सरकारकडून हे प्रकार सुरू आहेत. या सर्व कपोलकल्पित गोष्टी आहेत. आमचा एकही आमदार फुटणार नाही, असा दावाही गिरीश महाजन यांनी केला. राज्यभर ग्रामपंचायत निवडणूक महाविकास आघाडीने एकत्रितपणे लढवाव्या. त्यांना आमच्या शुभेच्छा आहेत, असेही गिरीश महाजन यांनी शेवटी सांगितले.
वाचा:
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
