एचडीएफसी म्युच्युअल फंडाने या योजनेची श्रेणी बदलली; गुंतवणूकदारांना निधी काढून घेण्याचा तज्ज्ञांंचा सल्ला

मुंबई : देशातील दुसरी मोठी म्युच्युअल फंड व्यवस्थापन करणारी कंपनी असलेल्या एचडीएफसी म्युच्युअल फंडाने ‘हाऊसिंग अपॉर्च्युनिटीज फंड’ या योजनेची श्रेणी बदलली आहे. ‘हाऊसिंग अपॉर्च्युनिटीज फंड’ सिरीज-१ची श्रेणी क्लोज एंडेड वरून ओपन एंडेडमध्ये बदलली आहे. या योजनेची महिनाभरात मुदतपूर्तता होणार आहे. त्यापूर्वीच असा बदल करण्यात आल्याने गुंतवणूकदारांना निधी काढून घेण्याचा सल्ला देण्यात येत आहे.

‘हाऊसिंग अपॉर्च्युनिटीज फंड’ची कामगिरी सुमार ठरली आहे. या योजनेत ३०८८ कोटी रुपये आहेत. दरम्यान या योजनेला ओपन एंडेड योजनेच्या श्रेणीत बदल केल्याने ही योजना लॉक इन पिरियडशिवाय निरंतर सुरु राहील आणि त्यात गुंतवणूकदार पैसे गुंतवतील, असे कंपनीचे मत आहे. मात्र या योजनेची आतापर्यंतची कामगिरी बघितली तर ती सुमार ठरली आहे. त्यामुळे सध्या ज्यांनी यात पैसे गुंतवले आहेत त्यांनी त्यातून काढून घ्यावे, असा सल्ला गुंतवणूक तज्ज्ञांनी दिला आहे.

‘हाऊसिंग अपॉर्च्युनिटीज फंड’ची क्लोज एंडेड योजना नोव्हेंबर २०१७ मध्ये सादर करण्यात आली होती. याचा गुंतवणूक कालावधी १४४० दिवस होता. याचा अर्थ १८ जानेवारी २०२१ रोजी याचा लॉक इन पिरियड पूर्ण होणार आहे. या तीन वर्षात कोणत्याही गुंतवणूकदाराला पैसे काढण्यास मनाई होती. मात्र तीन वर्षात गुंतवणूकदारांना वर्षाला १.७९ टक्के नुकसान सहन करावे लागले आहे. ज्या गुंतवणूकदारांनी सुरुवातीला या योजनेत एक लाख रुपये गुंतवले असतील तर त्याचे गुंतवणूक मूल्य ९५ हजार रुपये झाले आहे. याच कालावधीत म्युच्युअल फंडाच्या इतर योजना आणि शेअर बाजाराने चांगली कामगिरी केली आहे.

‘हाऊसिंग अपॉर्च्युनिटीज फंड’ची १४ डिसेंबर रोजी एनएव्ही ९.४६ रुपये आहे. या योजनेच्या बेंचमार्कने याच कालावधीत ९.६५ टक्के रिटर्न दिला आहे. ज्या गुंतवणूकदारांनी २७ नोव्हेंबर रोजी १० हजार रुपयांची गुंतवणूक केली आहे. त्यांची गुंतवणूक ९०८२ रुपये झाली आहे. योजना सादर केल्यानंतर पाच महिन्यानंतर योजनेतील ८० टक्के निधी इक्विटीमध्ये गुंतवण्यात आला होता. स्मॉल कॅप शेअरमध्ये मोठ्या प्रमाणात निधी गुंतवण्यात आला होता. जेव्हा स्मॉल कॅप शेअर्सची कामगिरी अत्यंत खराब होती. फंड व्यवस्थापकाचा निर्णय चुकला पण त्याचबरोबर शेअरची निवड आणि निधीचे वर्गीकरण देखील चुकले होते. ज्या स्मॉल कॅप शेअरची निवड करण्यात आली त्यांची कामगिरी खराब होती.

म्युच्युअल फंड उद्योगातील प्रसिद्ध फंड मॅनेजर प्रशांत जैन १ जून २०२९ पासून या योजनेचे व्यवस्थापन करत आहेत. या योजनेच्या पोर्टफोलिओमध्ये ३७ शेअर आहेत. या योजनेचा एक्स्पेन्स रेशो १.३४ टक्के आहे. जस जशी योजना मुदतपूर्तीच्या दिशेने वाटचाल करत आहे त्याच वेळी कंपनी व्यवस्थापनाने यातील निधी लिक्विड असेटमध्ये केले आहे. लिक्विड असेटमधून परतावा कमी मिळतो, असे बोलले जाते. याच काळात इक्विटी बाजाराची कामगिरी सरस ठरत आहे.