लॉकडाऊन नंतर शिर्डी येथील श्री साईबाबा समाधी मंदिर हे दिवाळी पाडव्याच्या मुहूर्तावर साईभक्तांसाठी खुले करण्यात आले. तेव्हापासून आतापर्यंत म्हणजेच गेल्या महिनाभरात जवळपास ३ लाख ३२ हजार साईभक्तांनी शिर्डीत येऊन दर्शन घेतले आहे. मंदिर खुले केल्यानंतर सुरुवातीला दररोज सहा हजार साईभक्तांना दर्शनासाठी मंदिरात सोडण्यात येत होते. त्यानंतर ही संख्या नऊ हजारापर्यंत वाढविण्यात आली. तर आता साईबाबा मंदिरात जाऊन दररोज बारा हजार साईभक्त दर्शन घेत आहेत. हि संख्या पंधरा हजारापर्यंत वाढवता येऊ शकते, पण त्यासाठी साईभक्तांच्या मदतीची आवश्यकता असल्याचे संस्थानच्या वतीने स्पष्ट करण्यात आले आहे.
मंदिर खुले झाल्यापासून प्रत्येक गुरुवारी, शनिवारी व रविवारी तसेच सार्वजनिक सुट्टीच्या दिवशी दर्शनासाठी मोठ्या प्रमाणावर शिर्डीत गर्दी होत आहे. सुट्टीच्या दिवशी तर वीस हजारपेक्षा जास्त लोक दर्शन काउंटरवर गर्दी करत असल्याचा अनुभव आला आहे. करोनाच्या पार्श्वभूमीवर ही गर्दी अडचणीची ठरू शकते. त्यामुळे कोणीही ऑनलाईन बुकिंग केल्याशिवाय शिर्डी दर्शनाला येऊ नये, असे आवाहनही करण्यात आले आहे.
पुढील आठवड्यात नाताळ सुट्टी आहे. तर २९ व ३० डिसेंबर रोजी दत्त जयंती कार्यक्रम असून ३१ डिसेंबरला वर्ष अखेर आहे. हे सर्व पाहता शिर्डीमध्ये साईभक्तांची गर्दी होण्याची शक्यता नाकारता येत नाही. पण कोणीही दर्शन पास ऑनलाइन घेतल्याशिवाय शिर्डीत थेट येऊ नये. कारण दररोज संस्थानकडून उपलब्ध करून देण्यात येणाऱ्या दर्शन पास पैकी ७० टक्के पास हे ऑनलाइन असून उर्वरित पास हे ऑफलाइन पद्धतीने शिर्डीत दर्शन पास काउंटर देण्यात येतात. हे पास संपल्यावर दर्शन पास काऊंटर बंद करण्यात येणार आहेत. त्यामुळे पास न मिळाल्यास भक्तांची गैरसोय होऊ शकते. ही सर्व पार्श्वभूमी लक्षात घेऊनच कोणीही ऑनलाइन दर्शन पास घेतल्याशिवाय शिर्डीत येऊ नये, असेही स्पष्ट करण्यात आले आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
