मुंबई : राज्यातील महापालिका क्षेत्रांमध्ये रात्री ११ ते सकाळी ६ वाजेपर्यंत लागू करण्यात आली आहे. पण संचारबंदीच्या काळात रात्री विमानतळावर उतरल्यानंतर घरी जाणार कसं, असा प्रश्न प्रवाशांच्या मनात आहे. पण रात्री ११ वाजतानंतर सकाळी ६ पर्यंत आगमन होणारे प्रवासी कॅबद्वारे आपापल्या घरी जाऊ शकतील. संचारबंदीत सार्वजनिक वाहतूक सुरु ठेवण्यास परवानगी असल्याचा विमानतळ प्रशासनाचा दावा आहे. यादरम्यान ८ ते १० विमानांचे आगमन छत्रपती शिवाजी महाराज आंतरराष्ट्रीय विमानतळावर होते.

छत्रपती शिवाजी महाराज आंतरराष्ट्रीय विमानतळावर सोमवारी रात्री लंडनहून तीन आणि अॅमस्टरडॅम येथून एक विमान आले. त्यात ६९० प्रवासी होते. नियमानुसार त्यांचे संस्थात्मक विलगीकरण करण्यात आले आहे, तर मंगळवारची सर्व आंतरराष्ट्रीय आगमने रद्द करण्यात आली आहेत. इग्लंडमध्ये करोना विषाणूचा नवा प्रकार आढळल्यामुळे बुधवार मध्यरात्रीनंतर तेथून येणारी विमानसेवा बंद करण्यात आली आहे. मात्र त्यापूर्वी मुंबईत सोमवार मध्यरात्रीपासून पाच विमाने येणार होती. या विमानातून एक हजारांहून अधिक प्रवासी येण्याची शक्यता होती. त्यासाठी मुंबई महापालिकेने शहरातील विविध हॉटेल्समध्ये दोन हजार खोल्या सज्ज ठेवल्या आहेत.

यामध्ये एक हजार खोल्या फाइव्ह आणि फोर स्टार हॉटेलमधील आहेत, तर एक हजार खोल्या त्या खालील हॉटेलातील आहेत. विमानाने येणाऱ्या या सर्व प्रवाशांना सात दिवस हॉटेलमध्ये विलगीकरणात राहावे लागणार आहे. हॉटेलात राहाण्याचे शुल्क प्रवाशांनाच भरावे लागणार आहे, अशी माहिती महापालिका आयुक्त इक्बालसिंह चहल यांनी दिली. बुधवारपासून युरोप खंडातील इतर देशांमधून तसेच मध्य पूर्व आशिया खंडातील देशांमधून येणाऱ्या प्रवाशांना पालिकेच्या केंद्रांमध्ये सात दिवसांचे विलगीकरण सक्तीचे करण्यात येणार आहे, असंही महापालिका आयुक्त इकबाल सिंह चहल यांनी सांगितलं.

अमेरीकेसह, दक्षिण मध्य आशिया खंडातील देशांमधून येणाऱ्या प्रवाशांना त्यांच्या घरात विलगीकरण करण्यात येणार आहे. त्यांच्या हातावर तसे शिक्केही मारण्यात येणार असल्याचं आयुक्तांनी सांगितलं.

परदेशातून मुंबईत आलेल्या प्रत्येक प्रवाशाला मुंबईतच विलगीकरण व्हावे लागणार आहे. मुंबईबाहेर राहाणाऱ्या प्रवाशांना सात दिवस घरी जाण्याची परवानगी मिळणार नाही. इंग्लडहून आलेल्या प्रवाशांना सात दिवस हॉटेलमध्ये क्वारंटाईन करण्यात येणार आहे. त्यांची पाचव्या आणि सातव्या दिवशी आरटीपीसीआर चाचणी करुन घरी पाठविण्याबाबत निर्णय घेण्यात येणार आहे.

प्रवाशांची विमानतळावर प्राथमिक तपासणी होणार असून यात लंडनमधील प्रवाशांमध्ये कोविडची लक्षणे आढळल्यास त्यांना सेव्हन हिल्स आणि युरोपच्या इतर देशासह मध्ये पूर्व आशिया खंडातील देशातील रुग्णांमध्ये लक्षणे आढळ्यास त्यांना जी टी रुग्णालयात दाखल करण्यात येणार आहे. त्यांची स्वतंत्र व्यवस्था करण्यात येणार असल्याचं महापालिकेने स्पष्ट केलं.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here