धक्कादायक! धावत्या लोकलमधून तरुणीला ढकलले; अत्याचार करून ठार मारण्याचा प्रयत्न

अज्ञात व्यक्तीने एका २५ वर्षीय तरुणीला धावत्या लोकलमधून पुलावर ढकलून देत तिला जिवे मारण्याचा प्रयत्न केल्याचा धक्कादायक प्रकार उघडकीस आला आहे. ही तरुणी मंगळवारी सकाळी वाशी खाडी पुलावर रेल्वे रुळांलगत जखमी अवस्थेत सापडल्यानंतर हा प्रकार उघडकीस आला. प्राथमिक तपासात तरुणीवर लैंगिक अत्याचार झाल्याचे आढळून आले आहे. त्यानुसार वाशी रेल्वे पोलिसांनी अज्ञात व्यक्तीविरोधात जिवे ठार मारण्याचा प्रयत्न केल्याप्रकरणी तसेच बलात्काराचा गुन्हा दाखल करून या प्रकरणाच्या तपासाला सुरुवात केली आहे.

या घटनेतील जखमी तरुणी आई-वडील व भावंडांसह टिटवाळा येथे राहण्यास असून ती पवई येथे घरकाम करते. तसेच ती आठवड्यातून एकदा आपल्या घरी जात असते. त्यानुसार ती शनिवारी सायंकाळी आपल्या घरी टिटवाळा येथे गेली होती. रविवारी सायंकाळी ती पवई येथे आपल्या कामावर निघून गेली. त्यानंतर कुटुंबीयांशी तिचा संपर्क झाला नव्हता. मात्र मंगळवारी पहाटे ६ वाजण्याच्या सुमारास ही तरुणी वाशी खाडी पुलावर रेल्वे मार्गाच्या रुळांलगत जखमी अवस्थेत आढळून आल्याने मोटरमनने याबाबतची माहिती दिली. वाशी रेल्वे पोलिसांनी घटनास्थळी धाव घेतली. त्यानंतर रेल्वे पोलिस आणि आरपीएफच्या जवानाने तिला तत्काळ वाशी येथील महापालिकेच्या रुग्णालयात दाखल केले.

महापालिका रुग्णालयातील डॉक्टरांनी तरुणीवर प्रथमोपचार करून तिला पुढील उपचारासाठी मुंबईतील जे. जे. रुग्णालयात पाठवले आहे. सध्या या तरुणीची प्रकृती स्थिर असून ती अद्याप बोलण्याच्या अवस्थेत नसल्याचे वाशी रेल्वे पोलिस ठाण्याचे वरिष्ठ पोलिस निरीक्षक विष्णू केसरकर यांनी सांगितले. प्राथमिक तपासात तिच्यावर लैंगिक अत्याचार झाल्याचे आढळून आले आहे. मात्र फॉरेन्सिच्या अहवालानंतर स्पष्टता येईल, असे ते म्हणाले. या गुह्याच्या तपासासाठी वाशी रेल्वे पोलिसांनी हार्बर व मध्य रेल्वेवरील सर्व सीसीटीव्ही फुटेजची तपासणी केली. मात्र, ती कुठल्या स्टेशनवरून चढली हे सीसीटीव्हीत आढळून आले नाही.