करोना आजार कशामुळे होतो, त्याची माहिती महापालिकेकडे नाही. मात्र हा आजार संसर्गजन्य असून शिंकणे आणि खोकल्यामुळे पसरत असावा असा अंदाज महापालिका आरोग्य प्रशासनाने व्यक्त केला आहे. या आजाराचा प्रादुर्भाव रोखायचा असेल तर श्वसनसंस्थेशी संबंधित आजार असलेल्या व्यक्तिंचा सहवास टाळण्याच्या सूचना पालिकेकडून करण्यात आल्या आहेत. हातांची नियमित स्वच्छता राखणे, कच्चे अन्न किंवा मांस खाणे टाळणे, फळे आणि भाजीपाला स्वच्छ धुवून खाणे, खोकताना किंवा शिंकताना नाकाला रुमाल किंवा टिश्यूपेपर लावण्यात यावा. तसेच शिंकल्यानंतर टिश्यूपेपर झाकण असलेल्या कचऱ्याच्या डब्यात फेकणे आदी सूचनाही पालिकेने केल्या आहेत. संशयीत रुग्णाचे नमुणे एनआयव्ही पुणे येथे तपासणीसाठी पाठवण्यात येत असल्याचंही पालिकेने स्पष्ट केलं आहे.
दरम्यान, जगभरात करोना व्हायरसची लागण झाल्याने आतापर्यंत २५ जणांचा मृत्यू झाला आहे. या व्हायरसची लागण झाल्यानंतर ताप येणे, खोकला येणे, श्वास घेण्यास त्रास जाणवणे अशी लक्षणे आढळत असल्याचे जागतिक आरोग्य संघटनेने म्हटले आहे.
करोना आजाराची लक्षणं
>> सर्दी, खोकला
>> तीव्र ताप
श्वसनसंस्थेशी संबंधित गंभीर लक्षणं
>> श्वास घ्यायला त्रास होणे
>> न्यूमोनिया
>> अतिसार
>> काही रुग्णांमध्ये मुत्रपिंड निकामी होणं
>> प्रतिकारशक्ती कमी होणं
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
