पोलीस हवालदार प्रवीण रमेश गोरे आणि पोलीस नाईक अनिल दत्तू अवघडे अशी निलंबित केलेल्या दोघांची नावे आहेत. निलंबन कालावधीत मुख्यालय सोडून जाताना परवानगी घ्यावी आणि पोलीस निरीक्षक यांच्याकडे दररोज हजेरी द्यावी, असे आदेशात म्हटले आहे. गोरे व अवघडे यांची औंध परिसरात शनिवारी रात्री ते रविवारी सकाळपर्यंत बीटमार्शल म्हणून नेमणूक होती. रविवारी पहाटे औंध येथील शैलेश टॉवर सोसायटीच्या सुरक्षारक्षकाला कोणीतरी मारहाण करत असल्याचा नियंत्रण कक्षात फोन आल्यामुळे त्यांना घटनास्थळी पाठवले होते. सव्वा तीनच्या सुमारास ते घटनास्थळी गेले. अवघडे यांच्याकडे एसएलआर ही बंदूक होती. ते दुचाकीवरून खाली उतरले. त्यावेळी इमारतीमधून चार व्यक्ती हातामध्ये चाकू, कटावणी, गज घेऊन येत होते. त्यावेळी मोरे हे दुचाकी वळवून पळून गेले. चोरटे अवघडे यांच्या समोरून जात होते. त्यावेळी एका चोरट्याने त्यांच्यावर कटावणी उगारली. तर, दुसऱ्याने गाडी काढ असे सांगून पळ काढला.
अवघडे यांच्याकडे एसएलआर असताना देखील त्यांना अडविण्याचा अथवा पकडण्याचा काहीही प्रयत्न केला नाही. तसेच, चोरटे घटनास्थळावरून कारमधून निघून जात असताना वॉकीटॉकीवरून पुणे पोलीस व पिंपरी-चिंचवड आयुक्तालयाच्या नियंत्रण कक्षाला काहीही माहिती दिली नाही. त्यामुळे घरफोडीतील मुद्देमाल चोरून चोरटे पळून जाण्यात यशस्वी झाले. या घटनेच्या सीसीटीव्ही फुटेज उपलब्ध असून चोरटे मुद्देमाल घेऊन जाताना त्यात दिसत आहेत. गोरे हे आरोपींना पाहून दुचाकीवरून पळून जाताना स्पष्ट दिसत आहेत. तर, घटनास्थळापासून १०० मीटर अंतरावर असलेल्या दुसऱ्या सीसीटीव्हीत गोरे हे आरोपींची कार निघून जाण्याअगोदरच सहकारी अवघडे यांना सोडून पळून गेल्याचे दिसत आहे. या घटनेत दोघांनी निष्काळजीपणा आणि कर्तव्यात कसूर केल्याचे दिसून येत आहे. त्यामुळे शिस्तबद्ध पोलीस खात्याची प्रतिमा मलीन केल्याचा ठपका ठेऊन दोघांवर निलंबनाची कारवाई केल्याचे आदेशात म्हटले आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
