चीनने दिली करोना लशीला सशर्त मंजुरी; जाणून घ्या कोणती आहे लस

बीजिंग: जगात पहिल्यांदा करोना संसर्गाचा फैलाव सुरू झालेल्या चीनने अखेर आपल्या लशीला सशर्त मान्यता दिली आहे. चीनने सिनोफार्म कंपनीने विकसित केलेल्या लशीला मंजुरी दिली. करोनाचा फैलाव सुरू झाल्यानंतर काही लशींची चाचणी सुरू झाली होती.

वैद्यकीय उत्पादन प्रशासन उपायुक्त चेन शिफेई यांनी सांगितले की, लशीला बुधवारी रात्री मंजुरी देण्यात आली. ‘बीजिंग इन्स्टिट्यूट ऑफ बायोलॉजिकल प्रोडक्ट’ने निर्मिती केलेली लस देण्यात येणार आहे. या कंपनीला चीन सरकारकडून अनुदान देण्यात येते. करोनापासून बचाव होण्यासाठी लशीचे दोन डोस घ्यावे लागणार आहेत. ही लस ७९.३ टक्के प्रभावी असल्याचे चाचणीत आढळून आल्याची माहिती कंपनीच्यावतीने दिली. जगभरात लस स्पर्धेत असलेल्या कंपनीपैकी सिनोफार्म ही महत्त्वाची कंपनी आहे.

याआधी चीनेने आपात्कालीन वापरासाठी लशीला मंजुरी दिली होती. ही लस चीनच्या पीपल्स लिबरेशन आर्मीच्या जवानांना देण्यात आल्याचे वृत्त होते. तर, आरोग्य कर्मचारी व अत्यावश्यक सेवेतील कर्मचाऱ्यांना लस देण्यात येत होती. चीनमध्ये लशींचा काळाबाजार होत असल्याचे वृत्त आंतरराष्ट्रीय वृत्तसंस्थांनी दिले होते.

वाचा: वाचा:

दरम्यान, चीनने तयार केलेल्या करोनाप्रतिबंधक लशीचा वापर करण्यास बहारिनने मंजुरी दिली आहे. यापूर्वी बहारीन प्रशासनाकडून फायझर आणि बायोएनटेक कंपनीने एकत्रितपणे तयार केलेल्या लशीच्या वापरास परवानगी देण्यात आली आहे. बहरीनच्या स्थानिक वृत्तसंस्थांनी दिलेल्या माहितीनुसार, लवकरच सिनोफार्म लशीचा वापर तेथे केला जाणार आहे. मात्र, लशीवर केल्या जाणाऱ्या अभ्यासाबाबत अद्याप बहारीन प्रशासनाकडून सविस्तर माहिती देण्यात आलेली नाही. सिनोफार्म लस प्रभावी असल्याचे संयुक्त अरब अमिरातीकडून काही आठवड्यांपूर्वी जाहीर करण्यात आले होते.

वाचा:

ब्रिटनमध्ये लशीला मंजुरी
ऑक्सफर्ड विद्यापीठाने विकसित केलेल्या आणि अॅस्ट्राझेनेकाने उत्पादित केलेल्या कोविड-१९ लशीला ब्रिटनने बुधवारी मान्यता दिली. ब्रिटनने मान्यता दिलेली ही दुसरी लस असून याआधी फायझर एनबायोटेक लशीच्या वापरासाठी त्यांनी हिरवा कंदील दाखवला होता. ऑक्सफर्ड विद्यापीठाने भारतातील सीरम इन्स्टिट्युटसोबत लस विकसित केली आहे. ब्रिटिश औषध नियंत्रण विभागाकडून (एमएचआरए) या लशीसंदर्भातील चाचण्या करण्यात आल्या आणि त्यासंदर्भातील अंतिम आकडेवारी गेल्या आठवड्यात सरकारला सादर करण्यात आली. ‘एमएचआरए’कडून मान्यता मिळाल्याने या लशीची सुरक्षितता आणि परिणामकारकेवर शिक्कामोर्तब झाले असून राष्ट्रीय आरोग्य यंत्रणेकडून सर्वाधिक हाय रिस्क गटातील पहिल्या दोन रुग्णांना तातडीने ही लस दिली जाईल.