करोनाच्या पार्श्वभूमीवर ३० डिसेंबर ते ५ जानेवारीपर्यंत रात्री ११ ते सकाळी ६ पर्यंत संचारबंदी लागू करण्यात आली आहे. ३१ डिसेंबरला नागरिकांनी घराबाहेर न पडता नववर्षाचं स्वागत घरीच साधेपणाने करा, असे आवाहनही प्रशासनाकडून करण्यात येत आहे. त्यामुळं यंदाची थर्डी फर्स्ट मुंबईकरांना घरातच साजरी करावी लागणार आहे. हॉटेल आणि रेस्टॉरंट जरी बंद असले तरी मुंबई महापालिकेनं होम डिलिव्हरीसाठी परवानगी दिली आहे. मात्र, त्याचबरोबर काही सूचनाही देण्यात आल्या आहेत.
रात्री ११ नंतर पार्टी संपवू नका, नूतन वर्षाचे स्वागत घरीच करा. आता उपहारगृहांना रात्री ११ नंतर घरपोच सेवा देण्याची अनुमती देण्यात आली आहे, असं मुंबई महापालिकेनं ट्विट केलं आहे. त्याचबरोबर, नवीन वर्षात पदार्पण करताना करोनाविषयक सर्व नियमांचे काटेकोरपणे पालन करा, असं आवाहनही त्यांनी केलं आहे.
दरम्यान, सर्वसामान्य नागरिकांच्या भावना ओळखून मुंबई पोलिसांनी या कालावधीत घराबाहेर पडण्याची मुभा दिली आहे आणि गर्दी न करण्याचे आवाहन केले आहे. मुंबईत कडक पोलिस बंदोबस्त ठेवला असून त्याची रंगीत तालीम म्हणून बुधवारी रात्री ‘ऑपरेशन ऑल आउट’ हाती घेण्यात आले होते.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
