पोलिसांनी दिलेल्या माहितीनुसार, चौबेपूर पोलीस ठाण्याच्या हद्दीतील रौतापूर गावातील विमल वर्मा याचा बांधकाम साहित्याचा व्यवसाय आहे. तसेच घरी एक दुकान आहे. विमल वर्माचा मुलगा विकास ते दुकान चालवतो. २७ डिसेंबर रोजी विकास घरातून ३२ हजार रुपये घेऊन बाहेर निघाला होता. तो आपले मित्र अतुल आणि शिवम यांच्यासोबत फिरायला गेला होता. विकास रात्री उशिरा दारूच्या नशेत घरी परतला होता. तो घरी आल्यानंतर वर्माने त्याच्याकडे पैशांबाबत विचारणा केली. त्यावेळी अतुल आणि शिवमकडे पैसे असल्याचे त्याने सांगितले. त्यानंतर वर्मा याने २८ डिसेंबरला अतुलला शेतावर बोलावून घेतले.
अतुलकडे त्याने पैशांबद्दल विचारणा केली. त्यावर मला पैशांबाबत काहीही माहिती नाही, असे सांगितल्याने राग अनावर झालेल्या विमल वर्माने त्याला निर्वस्त्र करून बेदम मारहाण केली. वर्मा आणि त्याच्या साथीदारांनी चप्पल आणि लाठ्याकाठ्यांनी त्याला बेदम मारहाण केली. तिथे उपस्थित एका गावकऱ्याने व्हिडिओ शूट केला. तो व्हिडिओ सोशल मीडियावर व्हायरल झाला.
चौबेपूर पोलिसांनी दिलेल्या माहितीनुसार, विकासकडील ३२ हजार रुपये अतुल उर्फ सुल्हर याने हिसकावून घेतल्याचा आरोप विमलने केला आहे. अतुलला मारहाण केल्याप्रकरणी विमल आणि महेश या दोघांना अटक करण्यात आली आहे. या घटनेचा तपास केला जात आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
