गेल्या वर्षी फेब्रुवारी महिन्यात खजुरी खास भागात जातीय हिंसाचाराच्या प्रकरणात खालिदविरूद्ध खटला चालवण्यासाठी पुरेसे पुरावे उपलब्ध आहेत. त्यावेळी खलिद आणि ताहिर हुसेन यांच्यात कथित संपर्क होता, यासाठी एका साक्षीदाराचं विधान पुरेसे आहे, असं कोर्टानं म्हटलं आहे. दंगल भडकवणं, लुटमार आणि मालमत्तेच्या जाळपोळीसाठी जमावाला चिथावल्याचा आरोप हुसेनवर आहे. हुसेन हा कटाचा मुख्य सूत्रधार होता, असं कोर्टाने म्हटलं आहे.
खालिदवर अनेक आरोप
दिल्लीतील विविध भागांमध्ये जातीय दंगल भडकवण्याच्या कटात खालिद सक्रियपणे सामील होता, असा आरोप फिर्यादींनी केल्याचं आरोपपत्रात म्हटलं आहे. आरोपींनी जमावाला चिथावल्याने लूटमार झाली आणि घरं, दुकानांसह मालमत्तांची जाळपोळ झाली. सार्वजनिक मालमत्ता नष्ट केली, असं कोर्टाने म्हटलं आहे.
फिर्यादीचा साक्षीदार राहुल कसानाच्या जबाबाची कोर्टाने दखल घेतली. कसाना हा त्यावेळी हुसेनच्या गाडीवर चालक म्हणून काम करत होता. नागरिकत्व सुधारणा कायदाविरोधात (सीएए) आंदोलन करणाऱ्या आणि त्यात सहभागी असलेल्यांना हुसेन पैसे वाटले होते. हे आपण बघितल्याचं कसानाने जबाबात म्हटलं आहे, असं कोर्टाने स्पष्ट केलं.
८ जानेवारी २०२० ला आरोपी हुसेनला घेऊन शाहीन बागला गेला होता. तिथे कारमधून उतरल्यावर हुसेन एका कार्यालयात गेला होता आणि काही काळानंतर तो उमर खालिद, खालिद सैफी यांच्यासह कार्यालयात गेला, असं कसानाने म्हटलं आहे. उमर खालिद, आरोपी ताहिर हुसेन आणि इतर आरोपींनी मिळून हा कट रचल्याचं आरोपपत्रात म्हटलं आहे. यामुळे आरोपी उमर खालिदविरोधात कारवाई करण्यासाठी पुरेसे पुरावे उपलब्ध आहेत, असं कोर्टाने नमूद केलं.
संबंधित तुरुंग अधीक्षकांमार्फत पुरवणी आरोपपत्रांची एक प्रत खालिदला द्यावी, असे आदेश कोर्टाने तपास अधिकाऱ्यांना दिले. गेल्या वर्षी २४ फेब्रुवारीला ईशान्य दिल्लीत नागरिकत्व सुधारणा कायद्याचे समर्थक आणि विरोधक यांच्यात जातीय हिंसाचार झाला होता. यात ५३ जण ठार आणि सुमारे २०० जण जखमी झाले होते.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
