‘ऑनलाइन लॉटरी जाहीर झाल्यानंतर सदनिकांसाठी निवड झालेल्या नागरिकांच्या कागदपत्रांची छाननी करण्यासाठी ‘म्हाडा’चे कार्यालय, म्हाळुंगे आणि पिंपरी- चिंचवड या ठिकाणी शिबिरे घेतली जाणार आहेत. या ठिकाणी बँकांचे प्रतिनिधी उपस्थित राहणार आहेत. त्यासाठी विविध राष्ट्रीयीकृत आणि खासगी बँकांबरोबर बैठक घेण्यात आली आहे. या व्यवस्थेमुळे लाभार्थ्यांना कर्ज मिळण्याची सुविधा उपलब्ध होणार आहे’ अशी माहिती ‘म्हाडा’च्या पुणे विभागाचे मुख्य अधिकारी नितीन माने-पाटील यांनी पत्रकार परिषदेत दिली. यावेळी मुख्य प्रशासकीय अधिकारी विजय ठाकूर उपस्थित होते.
‘ऑनलाइन नोंदणीला सुरुवात झाल्यापासून आतापर्यंत एक लाख ९१ हजार ३४९ नागरिकांनी ‘म्हाडा‘च्या संकेतस्थळावर भेट दिली आहे. त्यापैकी ५३ हजार ४७२ नागरिकांनी प्रक्रिया पूर्ण केली आहे. ११ जानेवारीपर्यंत अर्ज करता येणार आहे’ असे माने-पाटील यांनी स्पष्ट केले.
दरम्यान, पाच हजार ६४७ सदनिकांपैकी पुणे आणि पिंपरी चिंचवड शहरामध्ये पाच हजार २१७ सदनिका आहेत. या सदनिकांसाठी ११ जानेवारीला रात्री बारा वाजेपर्यंत ऑनलाइन नोंदणी सुरू राहणार आहे. https://lottery.mhada.gov.in या संकेतस्थळावर ऑनलाईन अर्ज भरण्याची सुविधा देण्यात आली आहे. पंतप्रधान आवास योजना, प्रथम येणाऱ्यास प्रथम प्राधान्य, ‘म्हाडा’कडून बांधण्यात आलेले प्रकल्प आणि २० टक्के सर्वसमावेशक गृहनिर्माण योजनेंतर्गत या सदनिका स्वस्त दरात नागरिकांना उपलब्ध होणार आहेत.
एजंट्सवर विश्वास ठेऊ नये
‘या सदनिका मिळवून देण्यासाठी ‘म्हाडा’ने एजंट्सची नेमणूक केलेली नाही. त्यामुळे कोणत्याही एजंट्सवर विश्वास ठेऊ नये’ असे आवाहन माने पाटील यांनी केले आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
