मुंबई: ‘भंडारा जिल्हा रुग्णालयातील आगीच्या दुर्घटनेबाबत केंद्र सरकारनं दुःख व्यक्त केलं. दुःख व्यक्त करून काय होणार? थोडे राजकारण कमी करा, निवडणुकांवरील उधळपट्टी थांबवा आणि पंडित नेहरूंच्या काळात आरोग्य व्यवस्थेवर जसे काम झाले तसे करा,’ असा खोचक सल्ला शिवसेनेनं केंद्र सरकारला दिला आहे. ( Vs BJP over )

भंडारा जिल्हा रुग्णालयातील विशेष शिशू केअर युनिटमध्ये आग लागून शुक्रवारी मध्यरात्री दहा नवजात बालकांचा मृत्यू झाला. त्यावरून विरोधी पक्षाच्या नेत्यांनी प्रशासनाबरोबरच अप्रत्यक्षपणे राज्य सरकारवर टीका केली होती. पंतप्रधान नरेंद्र मोदी यांनी ट्विटरच्या माध्यमातून दु:ख व्यक्त केलं होतं. तर, राज्याचे विरोधी पक्षनेते देवेंद्र फडणवीस यांनी फायर सेफ्टीचा मुद्दा उपस्थित करत प्रशासकीय दिरंगाईवर बोट ठेवलं होतं. विधान परिषदेतील विरोधी पक्षनेते प्रवीण दरेकर, आमदार राम कदम यांनीही आरोग्य व्यवस्थेवर प्रश्नचिन्ह उपस्थित केलं. शिवसेनेनं मुखपत्र दैनिक ‘सामना’च्या अग्रलेखातून भाजप नेत्यांच्या टीकेचा समाचार घेतला आहे. उत्तर प्रदेशच्या गोरखपूर रुग्णालयात प्राणवायूअभावी झालेल्या चिमुकल्यांच्या मृत्यूची आठवणही शिवसेनेनं यानिमित्तानं करून दिली आहे. ‘भारतीय जनता पक्ष भंडाऱ्याच्या दुर्दैवी घटनेचे राजकीय भांडवल करत आहे. हा बेशरमपणाचा कळस आहे,’ अशी घणाघाती टीका शिवसेनेनं केली आहे.

अग्रलेखातील ठळक मुद्दे:

>> पंतप्रधान म्हणतात त्याप्रमाणे भंडाऱ्यातील घटना हृदय पिळवटून टाकणारी आहे, पण विषय फक्त भंडाऱ्याचा नाही, तर देशातील एकंदरीत आरोग्य व्यवस्थाच गुदमरून तडफडत आहे.

>> देशाच्या व राज्याच्या अर्थसंकल्पात सगळ्यात कमी तरतूद ही आरोग्य व्यवस्थेवर असते व त्या हलगर्जीपणाचीच किमत भंडारा रुग्णालयातील दहा नवजात बालकांनी चुकवली आहे. करोना काळात सरकारने चांगले काम केले. भव्य कोविड सेंटर्स उघडली. डॉक्टर्स, नर्सेस यांनी मोठे कार्य केले हे नक्कीच कौतुकास्पद आहे, पण ‘कोविड’शी लढा म्हणजेच फक्त आरोग्य व्यवस्था नाही.

>> पाचवी आर्थिक महासत्ता होण्याच्या वल्गना आपण करतोय, पण आरोग्य सुविधा आणि सेवांच्या बाबतीत आपण पहिल्या ७५ देशांतही नाही. महाराष्ट्रातील आरोग्य सेवा देशाच्या इतर राज्यांच्या तुलनेत बरी असेल, पण बरी म्हणजे कामचलाऊ असणे व सर्वोत्तम असणे यात फरक आहे. म्हणूनच भंडाऱ्यात दहा बालकांचे मृत्यू हा धक्कादायक प्रकार आहे.

वाचा:

>> भारतीय जनता पक्षाने या दुर्घटनेचे राजकीय भांडवल लगेच सुरू केले. हा बेशरमपणाचा कळस आहे. दहा बालकांचे मृत्यू ही सरकारची जबाबदारी नक्कीच आहे, पण मागची पाच वर्षे सत्तेवर असलेल्यांनाही आपली कातडी वाचविता येणार नाही. विदर्भाच्या विकासात भंडाऱ्यातील सामान्य रुग्णालयाचा विकास येत नाही काय? हा प्रश्न असला तरी या दुर्घटनेचे राजकारण करणे हे त्या मृत बालकांच्या टाळूवरचे लोणी खाण्यासारखेच आहे.

>> भंडाऱ्यातील जिल्हा रुग्णालयात झालेल्या दहा बालकांच्या मृत्यूचे खापर ‘यांच्यावर किंवा त्यांच्यावर’ फोडत बसण्यापेक्षा या दुर्घटनेचे आत्मचिंतन करून संपूर्ण आरोग्य व्यवस्थेस नवसंजीवनी देता येईल काय, याचा विचार व्हायला हवा. यापुढे एकही बालक अशा निर्घृण पद्धतीने दगावणार नाही व माता-पित्यांवर आक्रोश करण्याची वेळ येणार नाही याकडे लक्ष देणे गरजेचे आहे.

>> केंद्र सरकारने या घटनेबाबत दुःख व्यक्त केले. दुःख व्यक्त करून काय होणार? थोडे राजकारण कमी करा, निवडणुकांवरील उधळपट्टी थांबवा आणि पंडित नेहरूंच्या काळात आरोग्य व्यवस्थेवर जसे काम झाले तसे करा. ‘एम्स’सारख्या संस्था पंडित नेहरूंनी उभ्या केल्या तसे काही प्रमुख शहरांत घडावे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here